काठमाडौं । नेपाल राष्ट्र बैंकले भुक्तानी प्रणाली सञ्चालक संस्थालाई सम्पत्ति शुद्धीकरण तथा आतंकवादी कार्यमा लगानीसम्बन्धी जोखिमहरुको पहिचान, मूल्यांकन एवं व्यवस्थापनको उपयुक्त उपायहरु अपनाउन निर्देशन दिएको छ । भुक्तानीसम्बन्धी कार्य गर्न अनुमतिपत्रप्राप्त संस्थाहरुलाई जारी गरिएको भुक्तानी प्रणालीसम्बन्धी एकीकृत निर्देशन–२०८० मा संशोधन/परिमार्जन र थप गदै उक्त उपायहरु अपनाउन निर्देशन दिएको केन्द्रीय बैंकले जनाएको छ ।
संशोधनपश्चात् अब व्यक्तिको एउटा खाताबाट एकै प्रकृति (डेबिट/क्रेडिट/प्रिपेड) को एक भन्दा बढी कार्ड जारी गर्न नपाइने भएको छ । तर, डोमेस्टिक कार्ड स्किम अन्तर्गतका कार्डहरु जारी गर्न भने बाधा नपर्ने बताइएको छ ।
सेवा बन्द गर्न ग्राहकले कार्डमार्फत् उपलब्ध हुने नियर फिल्ड कम्युनिकेसन (एनएफसी), थ्रीडी सेक्युयोर, भर्चुअलाइजेसन लगायतका अन्य सुविधाहरुको उपयोगिता, जोखिम तथा शुल्क तिर्नु पर्ने भएमा सोसम्बन्धी जानकारी गराउनुपर्ने भएको छ ।
ग्राहकलाई विद्युतीय कार्ड जारी गर्दा आवेदन फाएरमसँगै कार्ड जारी गर्दा र कारोबार गर्दा लाग्ने शुल्क, कारोबारको सीमा, कार्डको प्रयोग गर्दा लाग्ने ब्याजदर, कार्डबाट प्राप्त हुने अन्य सुविधाहरू लगायतका विषय समेटिएको सूचनामूलक सामाग्री प्रदान गर्नुपर्ने व्यवस्था भने हटाइएको छ ।
यस्तै प्रत्येक कारोबार सम्पन्न भएपछि अनिवार्य रूपमा सम्बन्धित ग्राहकलाई तत्काल एसएमएस मार्फत सन्देश दिनुपर्ने तथा ग्राहकले अन्य विद्युतीय माध्यमबाट सन्देश माग गरेमा सो समेत उपलब्ध गराउनुपर्ने व्यवस्था पनि हटाइएको छ ।
यसैगरी राष्ट्र बैंकले संस्थापक शेयर खरिदबिक्री र नामसारी सम्बन्धी पनि नयाँ व्यवस्था गरेको छ । संस्थापक शेयरको खरिद/बिक्री वा नामसारी गर्नुपूर्व राष्ट्र बैंकको स्वीकृति लिनुपर्ने, स्वीकृतिको लागि सञ्चालक समितिको सिफारिस तथा अन्य शेयरधनीको लिखित सहमतिसहित निवेदन दिनुपर्ने, अनुमतिपत्रप्राप्त भएको मितिले ५ वर्षसम्म संस्थापक शेयर खरिद बिक्री गर्न नपाइने व्यवस्था गरिएको छ । तर आधुनिक प्रविधि भित्र्याउन पूँजी थप गर्नुपर्ने अवस्था वा दुई वा दुईभन्दा बढी संस्था एक आपसमा गाभिई नयाँ लगानीकर्ता थप गर्दा वा अन्य कुनै
मनासिव कारणले संस्थापक शेयर खरि/बिक्री गर्नुपर्ने औचित्य पुष्ट्याई हुने अवस्थामा बैंकको स्वीकृति लिई संस्थापक शेयर खरिद बिक्री गर्न भने सकिने संशोधित व्यवस्थामा उल्लेख गरिएको छ ।
