काठमाडौं । सञ्चालनमा रहेका आधाभन्दा बढी वाणिज्य बैंकले असारका लागि निक्षेपको ब्याजदर घटाएका छन्। ११वटा बैंकले असारका लागि निक्षेपको ब्याजदर घटाएका हुन्।
यस्तै तीन वटा बैंकले ब्याजदर बढाएका छन् भने ६ वटाको ब्याजदर स्थिर छ।
असारका लागि ब्याजदर घटाउनेमा सिटिजन्स, एभरेष्ट, ग्लोबल आईएमई, कुमारी र लक्ष्मी सनराइन बैंक रहेका छन्। यसैगरी नेपाल एसबीआई, एनआईसी एशिया, एनएमबि, प्राइम, राष्ट्रिय वाणिज्य र सानिमा बैंकले जेठको तुलनामा असारमा कम ब्याज दिनेछ।
हिमालयन, माछापुच्छ्रे र नबिल बैंकले बचतकर्तालाई असारमा बढी ब्याज दिने भएका छन्। कृषि विकास, नेपाल बैंक, नेपाल इन्भेस्टमेन्ट मेगा, प्रभु, सिद्धार्थ र स्ट्यान्डर्ड चार्टर्ड बैंकको जेठ र असारको ब्याजदर समान रहेको छ।
सबैभन्दा बढी ग्लोबल आइएमई बैंकले असारका लागि जेठको तुलनामा ब्याजदर घटाएको छ । बैंकले हाल दिइरहेको ७.५ बाट ब्याजदर घटाएर असारका लागि ६.५ प्रतिशत तोकेको छ ।
असार महिनाका लागि प्रकाशित दरअनुसार सबैभन्दा बढी ब्याज हिमालयन बैंकले दिनेछ । हिमालयनले मुद्दती निक्षेपमा वार्षिक ८.२५ प्रतिशत ब्याज दिने बताएको छ ।
जेठमा बैंकहरुको अधिकतम औसत ब्याजदर ६.९९ प्रतिशत रहेकामा असारका लागि ६.८७ प्रतिशतमा झरेको छ ।
राष्ट्र बैंकको निर्देशन अनुसार अघिल्लो महिनामा लागु हुने ब्याजदर पछिल्लो महिनाको मसान्तसम्म बैंकहरुले सार्वजनिक गर्नु पर्छ। सोही अनुसार बैंकहरुले असारका लागि ब्याजदर सार्वजनिक गरेका हुन्।
बैंकहरुको ब्याजदर
