काठमाडौं । शिखर इन्स्योरेन्स कम्पनीले काभा महिला भलिबल क्लब च्याम्पिनयसिप विजेता नेपाल पुलिस क्लवका प्रत्येक सदस्यलाई नगदसहित सम्मान गरेको छ ।
नक्शालमा मंगलवार एक कार्यक्रम आयोजना गर्दै कम्पनीले च्याम्पियन पुलिसका प्रत्येक सदस्यलाईसहित सम्मान गरेको हो । शिखर इन्स्योरेन्सले प्रत्येक खेलाडी, प्रशिक्षक र म्यानेजरलाई समान ५० हजार एक रुपैयाँ नगद पुरस्कारसहित सम्मान गरेको हो ।
विधागततर्फ उत्कृष्ट खेलाडीलाई थप ५० हजार रुपैयाँबाट पनि पुरस्कृत गरिएको थियो । च्याम्पियनसिपमा नेपाल पुलिस क्लवकी उषा भण्डारी मेस्ट भ्यालुएबल प्लेयर र उत्कृष्ट आउट साइट हिटर घोषित भएकी थिइन् । त्यसबापत उनलाई दुई विधामा उत्कृष्ट पुरस्कार थप गर्दै कुल एक लाख ५० हजार दुई रुपैयाँ पुरस्कृत गरिएको हो ।
त्यस्तै सुमित्रा रेग्मी उत्कृष्ट मिडल ब्लकर र शान्तिकला तामाङ उत्कृष्ट लिबेरो घोषित भएकी थिइन् । दुवैलाई पुरस्कार रकमबाट ५० हजार हजार थप गर्दै एक लाख दुई रुपैयाँसहित सम्मान गरिएको हो । रूपेश विष्ट मुख्य प्रशिक्षक र सहायक प्रशिक्षकमा सुशीला थापा थिए । प्रशिक्षकद्वयसँगै अफिसियललाई पनि समान ५० हजार रुपैयाँसहित सम्मान गरिएको हो । नेतृ राम कुमारी झाक्री, शिखर इन्स्योरेन्सका अध्यक्ष गौरव अग्रवाल र सिइओ दीपप्रकाश पाण्डले विजेता खेलाडी तथा प्रशिक्षकलाई सम्मान गरेका हुन् ।
नेपाल पुलिस क्लवले फाइनलमा उज्बेकिस्तानको हुमो भलिबल क्लबमाथि ३–० को सोझो सेटमा हराउँदै उपाधि जितेको हो । पुलिस अपराजित रहँदै यो उचाल्न सफल भयो । माल्दिभ्समा शनिवार सम्पन्न च्याम्पियनसिपमा नेपाल पुलिस क्लबसहित उज्बेकिस्तान, श्रीलंका, माल्दिभ्स र ताजकिस्तानका ६ क्लवले प्रतिष्पर्धा गरेका थिए । लिग चरणामा नेपाल पुलिसले हुमोसँगै श्रीलंकाको श्रीलंका एयर फोर्स र ताजकिस्तानको डाइमेड भलिबल क्लवलाई समान ३–० ले हराएको थियो ।
नेपाल पुलिसले माल्दिभ्सका टोली वाम्को क्लबलाई ३–२ र माल्दिभ्स पुलिस क्लवलाई ३–१ को सेटमा पराजित गरेको थियो । पुलिसले आठौं एनभिए महिला भलिबल लिग च्याम्पियनको हैसियतमा काभा महिला क्लब च्याम्पियनसिपमा चुनौती प्रश्तुत गरेको हो । यस च्याम्पियनसिपमा सहभागी हुन पुलिसले एपिएफ क्लवकी स्पाइक सरस्वती चौधरी र निरुता ठगुन्नाका साथै न्यु डायमण्ड स्पोटर्स क्लवकी मिडल ब्लकर सुमित्रा रेग्मीलाई अनुवन्ध गरेको थियो ।
—न्युज एजेन्सी नेपाल
