काठमाडौं । सरकारले नेपाल बीमा प्राधिकरणको अध्यक्ष नियुक्ति प्रक्रिया अघि बढाएको छ। सोमबार बसेको मन्त्रिपरिषद्को बैठकले अध्यक्षका लागि सिफारिस गर्न तीन सदस्यीय समिति गठन गरेको हो।
समितिको संयोजक राष्ट्रिय योजना आयोगको सम्बन्धित क्षेत्र हेर्ने सदस्य रहनेछन् । अन्य सदस्यमा अर्थ सचिव र विज्ञ सदस्यको रूपमा ज्योतिचन्द्र ओझालाई चयन गरिएको छ।
नेपाल बीमा प्राधिकरणका निवर्तमान अध्यक्ष सूर्यप्रसाद सिलवालविरुद्ध अख्तियार दुरुपयोग अनुसन्धान आयोगले विशेष अदालतमा किर्ते र भ्रष्टाचारको मुद्दा दायर गरेपछि उनी स्वत: निलम्बनमा परेका थिए। सिलवालको निलम्बनपछि अध्यक्ष पद रिक्त रहेको छ।
हाल नेपाल बीमा प्राधिकरणको जिम्मेवारी अर्थ मन्त्रालयका सहसचिव मदन दहालले सम्हालिरहेका छन्। नयाँ अध्यक्षको नियुक्ति प्रक्रियाले प्राधिकरणमा स्थायित्व र नेतृत्वदायी भूमिका पुन:स्थापित गर्ने अपेक्षा गरिएको छ।
