काठमाडौं । नेपाल इन्भेष्टमेण्ट मेगा बैंक लिमिटेडको अध्यक्ष पदमा पुन पृथ्वी बहादुर पाँडे चयन भएका छन् ।
नेपाल इन्भेष्टमेण्ट मेगा बैंक लिमिटेडको मंगलबार बसेको संचालक समितिको ६१७ औं बैठकको निर्णयले पाँडेलाई सर्वसम्मत रुपमा संचालक समितिको अध्यक्ष पदमा चयन गरेको हो ।
पाँडेसँग बैंकिङ क्षेत्रमा झण्डै ४ दशकको अनुभव छ। मर्जरअघि उनी नेपाल इन्भेष्टमेन्ट बैंकका अध्यक्ष थिए। उनी हिमालयन बैंकका संस्थापक सदस्य समेत हुन्।
चार्टर्ड एकाउन्टेन्सीमा स्नातक गरेका पाँडे नेपाल इन्भेष्टमेन्ट मेगा बैंकमा पुनस् अध्यक्षमा नियुक्त भएका हुन्।
उनी नेपाल बैंकर्स एसोसिएसनका पूर्वअध्यक्ष पनि हुन्।
फागुन १५ गते सम्पन्न बैंकको ३८ औं वार्षिक साधारणसभा पश्चात भएको निर्वाचनमा संस्थापक समुह तर्फबाट पृथ्वी बहादुर पाँडे सहित प्रजन्य राजभण्डारी, मदन कुमार आचार्य र दिपंकर शाक्य उदय निर्विरोध निर्वाचित भएका थिए । सर्वसाधारण शेयरधनी समुहको तर्फबाट सञ्चालक समितिमा प्रतिनिधित्व गर्ने सञ्चालक पदको निर्वाचनमा कवि कुमार टिबरेवाला र शालिक राम बेल्बासे निर्वाचित भएका थिए ।
