काठमाडौं । उच्च अदालत पाटनले नेपाल बैंकको साधारणसभाबाट आज हुने भनिएको तीन सञ्चालकको निर्वाचन रोक्नेगरी अल्ककालिन अन्तरिम आदेश जारी गरेको छ । मंगलबार उच्च अदालतका कायममुकायम मुख्य न्यायाधीश लालबहादुर कुँवरको एकल इजलासले बैंकका पूर्व सञ्चालक विवेक शम्शेर जबराले दायर गरेको रिटमाथि सुनुवाइ गर्दै निर्वाचन नगराउन आदेश दिएको हो ।
नेपाल बैंकले बुधबार सर्वसाधारण शेयरधनीका तर्फबाट तीन सञ्चालक निर्वाचित गर्ने मुख्य एजेण्डासहित साधारणसभा बोलाएको छ । तर उच्च अदालतको आदेशपछि अब सञ्चालक पदको निर्वाचन स्थगित हुने भएको छ ।
विवेक शम्शेर जबराले पनि सञ्चालक पदका लागि मनोनयन दायर गरेका थिए । तर पदबाट राजीनामा दिएको ६ महिना नपुगी उम्मेदवारी मनोनयन गराएको भन्दै उनीविरुद्ध उजुरी परेको थियो । उजुरीपश्चात् निर्वाचन अधिकृतको कार्यालयले उनको उम्मेदवारी रद्द गर्ने निर्णय गरेको थियो ।
उम्मेदवारी रद्द भएपछि जबराले उक्त निर्णय उल्टाइ आफ्नो उम्मेदवारी पुनः स्वीकार गर्नुपर्ने माग गर्दै उच्च अदालतमा रिट दायर गरेका थिए । उच्चले उक्त रिटमाथि दुवै पक्षसँग छलफलपछि मात्रै अन्तरिम आदेश दिन सकिने बताउँदै दुवै पक्षलाई चैत ११ गते छलफलको लागि बोलाएको छ । उक्त छलफलपछि मात्रै जबराले उम्मेदवारी दिन पाउने नपाउने भन्ने अन्तरिम आदेश जारी हुनेछ ।
