काठमाडौं । नेपालको स्विजरल्याण्ड भनेर परिचित मनोरम पर्यटकीय गन्तव्य जिरीमा आगामी चैत्र १५ देखि १७ गतेसम्म ‘जिरी मेनिया -२०२५’ कार्यक्रम आयोजना हुने भएको छ। काठमाडौं लिजेंड्सद्वारा आयोजित यस बृहत मोटरसाइकल पर्यटन कार्यक्रममा २०० भन्दा बढी रोयल एनफिल्ड मोटरसाइकल चालकहरु नेपालका विभिन्न जिल्लाहरू, भारतका विभिन्न प्रान्तहरू, दक्षिण अफ्रिका, अमेरिका, फ्रान्स लगायतका देशहरूबाट सहभागी हुनेछन्।
जिरी नगरपालिका, जिरी उद्योग वाणिज्य संघ, जिरी होटेल व्यवसायी संघ लगायत स्थानीय सरोकारवालाहरूको आतिथ्यमा सहभागी पर्यटकहरूलाई भव्य स्वागत गरिनेछ। कार्यक्रममा सहभागीहरुले जिरीका रमणीय स्थानहरुको भ्रमण गर्ने, स्थानीय सांस्कृतिक प्रस्तुति, लाइभ ब्याण्ड, डिजे म्युजिक, परम्परागत परिकार तथा स्थानीय उत्पादनको अवलोकन तथा खरिद गर्न सक्नेछन्। यसले स्थानीय अर्थतन्त्रलाई टेवा पुर्याउने विश्वास गरिएको छ।
कार्यक्रम अवधिमा स्थानीय बासिन्दाहरूलाई पनि विशेष खेलकुद तथा सांस्कृतिक गतिविधिमा निःशुल्क सहभागी गराइने भएकोले हजारौं स्थानीय एवं अन्य पर्यटकहरूको उल्लेखनीय उपस्थिति रहने अपेक्षा गरिएको छ।
‘जिरी भ्रमण वर्ष -२०२५’ लाई प्रवर्द्धन गर्न विशेष योगदान दिने विश्वास गरिएको यस कार्यक्रमलाई सफल बनाउन जिरी नगरपालिका, जिरी उद्योग वाणिज्य संघ, जिरी होटेल व्यवसायी संघ लगायतका स्थानीय निकायहरूका साथै अल्फा अटोमोटिभ प्रालि र रोयल एनफिल्ड प्रमुख प्रायोजकका रूपमा संलग्न भएका छन्। साथै, अन्य विभिन्न संघ-संस्थाहरूले पनि भौतिक तथा आर्थिक सहयोग प्रदान गरेका छन्।
यस ऐतिहासिक मोटरसाइकल यात्राले जिरीको पर्यटन प्रवर्द्धन, स्थानीय उत्पादनको प्रचार(प्रसार तथा आर्थिक क्रियाकलापमा सकारात्मक प्रभाव पार्ने अपेक्षा गरिएको छ।
