काठमाडौं । बन्दीपुर बन्दीपुर केवलकार एण्ड टुरिजम लिमिटेडले २०८२ वैशाख ६ गते साधारणसभा बोलाएको छ । चैत ७ गते बसेको संचालक समितिको बैठकको निर्णय अनुसार कम्पनीको आव २०८०/८१ को चौथो वार्षिक साधारणसभा वैशाख ६ गते शनिबार बन्दीपुर परियोजना प्राङ्गण, बन्दीपुर (बटम स्टेशन) मा साधारणसभा बोलाएको हो ।
साधारणसभमा कम्पनीको अध्यक्षबाट प्रस्तुत गत आवको वार्षिक प्रतिवेदन लेखापरीक्षकको प्रतिवेदन पारित गर्ने साधारण प्रस्ताव रहेको छ । बैठकले आगामी वर्ष २०८१/०८२ का लागि लेखापरीक्षकको नियुक्ति तथा निजको पारिश्रमिक तोक्नेछ ।
कम्पनीको प्रबन्धपत्र तथा नियमावलीमा संशोधन गर्ने, कम्पनीको प्रबन्धपत्र तथा नियमावलीमा देखिएको केरमेटलाई शुद्धाशुद्धि गर्ने, तेस्रो साधारण सभा (आव २०७९ / २०८०) ले पारित गरी निर्णय अभिलेख भई कम्पनी रजिस्ट्रार तथा धितोपत्र बोर्डमा समेत सूचना अध्यावधिक भई सकेको प्रारम्भिक सार्वजनिक निष्कासन (आईपीओ) सम्बन्धी प्रस्तावलाई यथावत अविछिन्न रुपमा ग्रहण गर्ने र सोही अनुरुप यथाशीघ्र कार्यान्वयनमा ल्याउने प्रस्ताव गरिएको छ ।
