काठमाडौं । टोखा झोरबाट ट्रकसहित २५ करोड १८ लाख २४ हजार रुपैयाँ बराबरको युरो र डलर फेला परेको प्रकरणमा संलग्न रहेको व्यक्ति पहिचान गरिएको छ। राजस्व अनुसन्धान विभागका महानिर्देशक चण्डीप्रसाद घिमिरेका अनुसार उक्त रकम हाल टोखा नगरपालिका-१०, महादेवटार हाइटमा बसोबास गर्ने तथा स्थायी रूपमा सिन्धुपाल्चोक, भोटेकोशी गाउँपालिका-४ का नारायण पौडेलको भएको अनुसन्धानबाट खुलेको छ।
विभागका अनुसार पौडेलको नागरिकता नम्बर ९८३/७/१८४ रहेको छ। प्रारम्भिक अनुसन्धानपछि पौडेलकै रकम भएको पुष्टि भएसँगै अदालतबाट पक्राउ पुर्जी जारी गरिएको छ। वडा प्रतिनिधिको रोहवरमा पौडेलको घर खानतलासी गर्दा त्यहाँ एकजना मात्र कामदार भेटिएका थिए। घरमा उक्त घटनासँग सम्बन्धित थप प्रमाण भने फेला परेको छैन। हाल उनी फरार रहेको बताइएको छ।
अनुसन्धानका क्रममा पौडेल विभिन्न गैरकानुनी कारोबारमा संलग्न रहेको थप प्रमाणहरू समेत फेला परेका छन् . जसको अनुसन्धान अझै जारी छ।
महानिर्देशक घिमिरेका अनुसार प्रहरीले रकम बरामद गरेलगत्तै पौडेल योजनाबद्ध रूपमा फरार भएका देखिन्छन्। यो घटनाले राजस्व अनुसन्धान विभागले ठूला आर्थिक अपराधसम्बन्धी मुद्दा अनुसन्धान गर्न सक्ने क्षमता पुष्टि गरेको उनको दाबी छ।
राज्य तथा सुरक्षाकर्मीले फरार व्यक्तिलाई खोज्न व्यापक रूपमा प्रयास गर्नुपर्ने घिमिरेको भनाइ छ।
काठमाडौं अपराध अनुसन्धान कार्यालयले गत चैत ४ गते पैसा ओसारपसार गरिरहेको ट्रकसहित २५ करोड १८ लाख २४ हजार रुपैयाँ बराबरको विदेशी मुद्रा बरामद गरेको थियो। पक्राउ परेका ट्रकचालक सिन्धुपाल्चोक, भोटेकोशी गाउँपालिका-१ का ४३ वर्षीय कुसाङ लामा (फुच्चे)लाई चैत ५ गते राजस्व अनुसन्धान विभागलाई बुझाइएको थियो।
लामा चालक रहेको ना.७ ख १६५२ नम्बरको ट्रकमा लुकाइ राखिएको विदेशी मुद्रा रसुवाको केरुङतर्फ लैजान लाग्दा अनुसन्धान कार्यालयबाट खटिएको प्रहरी टोलीले ट्रकसहित उनलाई नियन्त्रणमा लिएको थियो। ट्रक खानतलासी गर्दा अमेरिकी डलर ३,११९ थान (१०० दरका), १७९ थान (५० दरका), युरो ११ थान (५०० दरका), ४८० थान (२०० दरका), ४,१४८ थान (१०० दरका), र १७,१७७ थान (५० दरका) बरामद गरिएको थियो।
