काठमाडौं । राजसंस्था पुनःस्थापनाका पक्षमा सक्रिय ‘संयुक्त जनआन्दोलन समिति’ले आजका लागि घोषणा गरेको काठमाडौं उपत्यका बन्द कार्यक्रम स्थगित गरेको छ ।
समितिले दोस्रो विज्ञप्ति जारी गर्दै जेठ १८ गते प्रदर्शनका क्रममा पक्राउ परेका आफ्ना सबै कार्यकर्ता रिहा भइसकेको जनाउँदै बन्द कार्यक्रम फिर्ता लिएको जानकारी गराएको हो ।
यसअघि आइतबार साँझ जारी विज्ञप्तिमा सरकारले आन्दोलनकारीमाथि दमन गरेको भन्दै समितिले सोमबार उपत्यका बन्दको घोषणा गरेको थियो ।
तर निषेधित क्षेत्र उल्लंघनपछि पक्राउ परेका राप्रपा नेपालका अध्यक्ष कमल थापा, सांसद दीपक सिंहसहित सात जनालाई प्रहरीले रिहा गरेसँगै राप्रपाका अध्यक्ष राजेन्द्र लिङ्देनले आफ्नो पार्टी बन्द कार्यक्रममा सहभागी नहुने बताएका हुन् ।
राप्रपाको असहभागितासँगै आन्दोलनको स्वरूप फिर्ता लिँदै समितिले बन्द कार्यक्रम नहुने जनाएको हो ।
