काठमाडौं । दार्चुला पावर कम्पनीले निर्माण गर्ने २८.३ मेगावाट क्षमताको मध्य चमेलिया जलविद्युत आयोजनामा नेपाल बैंक र नविल बैंकले ऋण लगानी गर्ने भएका छन् । आयोजनाका प्रवर्द्धक र वित्तीय संस्थाबीच बुधबार साँझ वित्तीय व्यवस्थापनसम्बन्धी सम्झौता भएको हो।
सम्झौतासभामा उर्जा, जलस्रोत तथा सिंचाई मन्त्री दीपक खड्का र दार्चुलाका प्रतिनिधि, नेपाली कांग्रेसका सांसद दिलेन्द्रप्रसाद बडु समेत उपस्थित थिए ।
नेपाल बैंक र नविल बैंकले आयोजना लागत पाँच अर्ब ६६ करोडमध्ये ७५ प्रतिशत ऋण लगानी गर्ने प्रतिबद्धता जनाएका छन् । बाँकी २५ प्रतिशत स्वपुँजीमा अपि पावर कम्पनीले ५१ प्रतिशत, अन्य जलविद्युत प्रवर्द्धकहरूले १९ प्रतिशत, र बाँकी सर्वसाधारण तथा स्थानीयको लगानी रहनेछ ।
यस आयोजनाको लागत प्रतिमेगावाट २० करोड रूपैयाँ अनुमान गरिएको छ । कम्पनीका अध्यक्ष सञ्जीव न्यौपानेका अनुसार आगामी डेढ वर्षभित्र आयोजना सम्पन्न गर्ने लक्ष्य छ । आयोजनाबाट वार्षिक १८५ गिगावाट घण्टा विद्युत उत्पादन हुने र नौ वर्षमा १३३ करोड रुपैयाँ आम्दानी हुने अनुमान गरिएको छ ।
