काठमाडौं । सङ्घीय संसद् अन्तर्गत प्रतिनिधि सभाको बैठक आज दिउँसो १ बजे सङ्घीय संसद् भवन नयाँ बानेश्वरमा बस्दैछ । आजको बैठकमा विभिन्न महत्त्वपूर्ण प्रतिवेदन तथा विधेयकहरू प्रस्तुत हुने कार्यसूची रहेको छ ।
प्रमुख कार्यसूची
महिला तथा सामाजिक मामिला समितिको प्रतिवेदन: महिला तथा सामाजिक मामिला समितिका सभापति किरणकुमार साहले समितिको वार्षिक प्रतिवेदन (आ.व. २०८०/८१) पेस गर्नेछन्।
बालबालिकासम्बन्धी (पहिलो संशोधन) विधेयक, २०८२: महिला, बालबालिका तथा ज्येष्ठ नागरिकमन्त्री नवलकिशोर साह सुडीले बालबालिकासम्बन्धी (पहिलो संशोधन) विधेयक, २०८२ प्रस्तुत गर्न अनुमति माग्ने प्रस्ताव पेस गर्नेछन् र त्यसपछि विधेयक प्रस्तुत गर्नेछन् ।
भूमिसम्बन्धी विधेयकमाथि छलफल र पारित गर्ने प्रक्रिया: भूमि व्यवस्था, सहकारी तथा गरिबी निवारणमन्त्री बलराम अधिकारीले भूमिसम्बन्धी केही नेपाल ऐनलाई संशोधन गर्ने विधेयक, २०८२ माथिको दफावार छलफल सदनमा गरियोस् भन्ने प्रस्ताव प्रस्तुत गर्नेछन्। उक्त विधेयकमाथि प्राप्त संशोधनलाई निर्णयार्थ प्रस्तुत गरिनेछ र त्यसपछि मन्त्री अधिकारीले सो विधेयकलाई पारित गरियोस् भन्ने प्रस्ताव राख्नेछन् ।
संवैधानिक परिषद् विधेयकमाथि निर्णय: सभामुख देवराज घिमिरेले संवैधानिक परिषद् (काम, कर्तव्य, अधिकार र कार्यविधि) सम्बन्धी पहिलो संशोधन विधेयकमाथि राष्ट्रिय सभाबाट भएको विचारमाथि संशोधनमाथि विचार गरियोस् भन्ने प्रस्तावलाई निर्णयार्थ प्रस्तुत गर्ने कार्यसूची रहेको छ ।
यी कार्यसूचीले आजको प्रतिनिधि सभा बैठकलाई महत्त्वपूर्ण बनाउने देखिन्छ ।
