काठमाडौं । नेपाल बैंकर्स एसोसिएसन (एनबीए) ले भिसासँग सहकार्य सम्झौतामा हस्ताक्षर गरेको छ । यो सहकार्य नेपालको वित्तीय क्षेत्रमा साइबर सुरक्षा सम्बन्धी जागरूकता र क्षमता विकासका लागि विभिन्न कार्यक्रम र गतिविधिहरू सञ्चालन गर्ने उद्देश्यले गरिएको हो ।
नेपालमा डिजिटल भुक्तानी प्रवर्द्धन गर्न लामो समयदेखि साझेदारी गर्दै आएका एनबीए र भिसाले यसपटक साइबर सुरक्षामा रणनीतिक ध्यान केन्द्रित गर्दै आफ्नो प्रयासलाई निरन्तरता दिएका छन् । संयुक्त पहल अन्तर्गत प्रादेशिक गतिविधिहरूका साथै सरोकारवालाहरूसँग विशेष अन्तरक्रिया सत्र पनि सञ्चालन गरिने जनाइएको छ ।
यो साझेदारी अन्तर्गत नेपालका सबै प्रदेशहरूमा साइबर सुरक्षा कार्यक्रम सञ्चालन गरिनेछ। प्रादेशिक गतिविधिहरूलाई सहयोग पुर्याउनका लागि एक व्यापक कार्यक्रम समेत आयोजना गरिनेछ, जसमा सरोकारवाला, विभिन्न निकायका अधिकारीहरू र नियामक संस्थाका प्रतिनिधिहरू सहभागी हुनेछन् । यी गतिविधिहरूको अतिरिक्त, भिसाका अधिकारीहरू र बैंकका अधिकारीहरूबीच विशेष अन्तरक्रिया सत्र पनि एनबीएले जनाएको छ ।
