काठमाडौं । जेनजीकाे प्रदर्शनबाट सबैभन्दा पीडामा रहेकाे भाटभटेनीले आफ्नो सुपर स्टोरमा काम गर्ने कोही पनि कर्मचारीलाई जागिरबाट ननिकाल्ने भएको छ । भाटभटेनी सुपर स्टोरका अध्यक्ष मीनबहादुर गुरुङले आफ्ना १२ वटा स्टोरहरु जलेर नष्ट भए पनि त्यहाँ काम गर्ने कर्मचारीलाई जागिरबाट ननिकाल्ने बताएका हुन् । प्रभावित शाखामध्ये उपत्यकाका नक्साल, महाराजगञ्ज, बौद्ध (चुच्चेपाटी), कोटेश्वर र बालुवाटार तथा उपत्यका बाहिरका पोखरा, चितवन, हेटौँडा, बिर्तामोड, दमक, विराटनगर र धरान पर्दछन्। यी शाखा पुनर्निर्माणपछि मात्र सञ्चालनमा आउनेछन्।
कम्पनीले क्षति पुगेका भाटभटेनीमा काम गर्ने कामदार अन्य शाखा स्टोरहरुमा लगिनेछ ।साथै, दसैँ पर्वलाई लक्षित गर्दै कर्मचारीलाई भत्ता पनि उपलब्ध गराइने कम्पनीले जनाएको छ। हाल भाटभटेनीका विभिन्न स्टोरहरुमा १० हजार बढी कामदार कार्यरत छन् ।
