काठमाडौं । वाणिज्य बैंकहरुले कात्तिक महिनाका लागि मुद्दति निक्षेपमा प्रदान गर्ने ब्याजदर घटाएका छन् । बैंकहरुले सूचना जारी गर्दै ब्याजदर घटेको जनाएका हुन् । असोज महिनामा बैंकहरुले व्यक्तिगत मुद्दति खातामा ५.४६ प्रतिशत ब्याज दिने गरेका थिए । कात्तिकका लागि उक्त दर घटेर ५.२० प्रतिशत कायम गरिएको छ ।
हाल सञ्चालनमा रहेका २० वाणिज्य बैंकहरुमध्ये १४ बैंकहरुले ब्याजदर घटाएका छन् । बाँकी ६ वाणिज्य बैंकहरुले भने व्यक्तिगत मुद्दति निक्षेपको अधिकतम ब्याजदर असोज महिनाकै यथावत् राखेका छन् । त्यस्तै, बैंकहरुले संस्थागत मुद्दति निक्षेपको अधिकतम औषत ब्याजदर ०.२२ प्रतिशतविन्दुले घटाएका छन् ।
कात्तिक महिनाका लागि सबैभन्दा बढी ब्याजदर घटाउने बैंकमा माछापुच्छ्रे बैंक र एनएमबि बैंक रहेका छन् । बैंकिङ प्रणालीमा अधिक तरलताका कारण बैंकहरुले ब्याजदर घटाएका हुन् ।
नेपालमा पछिल्ला महिनाहरुमा बैंकहरुले मुद्दति निक्षेपको ब्याजदर क्रमशः घटाएका छन् । यसको मुख्य कारण बजारमा तरलता बढ्नु, ऋणको माग घट्नु र राष्ट्र बैंकको मौद्रिक नीतिमा आएको सहजता हो।
हाल बैंकहरुमा निक्षेप धेरै आएको छ तर ऋण लिन चाहनेको संख्या घटेको छ। यस्तो अवस्थामा बैंकहरुमा अतिरिक्त रकम थुप्रिन्छ, जसले गर्दा नयाँ निक्षेप आकर्षित गर्न उच्च ब्याज दिने आवश्यकता रहँदैन । त्यसैले ब्याजदर स्वाभाविक रुपमा घटाइन्छ।
यसरी हेर्दा मुद्दति निक्षेपको ब्याजदर घट्नुको मूल कारण अर्थतन्त्रमा देखिएको तरलता वृद्धि, ऋण मागको कमी र मौद्रिक नीतिको सहजता हो। यो कदमले बैंकहरुको लागत घटाए पनि बचतकर्ताको प्रतिफल घटाउँछ र ऋण लिने वर्गका लागि फाइदा पुर्याउँछ।
