वीरगञ्ज । चालु आर्थिक वर्षको तीन महिनामा वीरगञ्ज नाका भएर ३८ अर्ब ९ करोड रुपैयाँ बराबरको पेट्रोलियम पदार्थ आयात भएको छ । डिजेल, पेट्रोल, लिक्विफाइड पेट्रोलियम ग्यास (एलपिजी), एभिएसन टर्बाइन फ्युल (एटिएफ) र मट्टितेल आयातबाट १६ अर्ब १२ करोड रुपैयाँ राजस्व सङ्कलन भएको छ ।
वीरगञ्ज भन्सार कार्यालयका अनुसार गत आवको तीन महिनाको तुलनामा चालु आवको सोही अवधिमा रकमको आधारमा पाँच थरिका पेट्रोलिम पदार्थको आयातमा १ अर्ब ६ करोड रुपैयाँले कमी आएको छ । जबकी गत आवको तीन महिनाको अवधिमा भने ३९ अर्ब १५ करोड रुपैयाँ पर्ने पेट्रोलियम पदार्थको आयात हुँदा १६ अर्ब ७ करोड रुपैयाँ राजस्व सङ्कलन भएको छ ।
भन्सार कार्यालयका प्रमुख भन्सार प्रशासक विष्णुप्रसाद ज्ञवालीले चालु आवको तीन महिनामा पेट्रोलियम पदार्थको आयातमा केही कमी आएको बताए । वीरगञ्ज भन्सार कार्यालयका चालु आवको असोज मसान्तसम्म १५ अर्ब ७२ करोड रुपैयाँ पर्ने १ लाख ७४ हजार ९२४ किलोलिटर डिजेल आयात भएको छ ।
सो डिजेल आयातबाट ६ अर्ब ९६ करोड रुपैयँा राजस्व सङ्कलन भएको छ । चालु आवको तीन महिनामा १० अर्ब ७२ करोड रुपैयाँ पर्ने १ लाख २५ हजार ३८० किलोलिटर पेट्रोल आयात भएको छ । सो पेट्रोल आयात हुँदा रु ७ अर्ब ९ करोड राजस्व सङ्कलन भएको छ । चालु आवको तीन महिनाको अवधिमा ७ अर्ब ४९ करोड रुपैयाँ पर्ने सात करोड ३९ लाख ७७ हजार २ सय ७१ किलोग्राम एलपि ग्यास आयात भएको छ ।
