काठमाडौं । नेपाल उद्योग परिसंघका अध्यक्ष वीरेन्द्रराज पाण्डेले सरकारलाई कर वृद्धि भन्दा पनि दायरा वृद्धि गर्न आग्रह गरेका छन् ।
सोमवार कर दिवसको अवसरमा आयोजित कार्यक्रमलाई सम्बोधन गर्दै उनले कर बढाउने भन्दा पनि यसको दायराहरु फराकिलो बनाउदै लैजानु पर्ने बताए ।
उनले लगानी विस्तार एवं औद्योगिक वातावरणका लागि नीतिगत स्थायित्व आवश्यक हुने बताए । स्वदेशी लगानीकर्ताले मात्रै नभइ विदेशी लगानीकर्ताले पनि कर सम्बन्धी नीतिका कारण दायित्व हेरेर मात्रै लगानी गर्ने उनको भनाइ छ । मुलुक विषम परिस्थितिमा रहेको बताउँदै उनले केही समयअघिसम्म अर्थतन्त्र चुनौतिपूर्ण अवस्थामा रहेको भएपनि अहिले जेन जी आन्दोलनपछि राजनीतिक, सामाजिक क्षेत्रमा समेत चुनौती थपिएको बताए ।
मुलुकको समग्र आर्थिक विकासका लागि सुशासन, भ्रष्टाचार नियन्त्रण, सार्वजनिक क्षेत्रमा पारदर्शिता, नीतिगत स्पष्टतासँगै स्थिरता आवश्यक रहेको पाण्डेको भनाइ छ ।
मुलुक छिटै नयाँ चरणमा प्रवेश गर्ने र त्यसमा सुशासन, लगानी, व्यक्तिगत सुरक्षासँगै लगानीको वातावरणमा व्यापक सुधार हुने अपेक्षा निजी क्षेत्रले लिएको उनको भनाइ छ ।
राजस्वका कारण सरकारसमेत दबाबमा रहँदै आएको र राजस्व बढाउन करको दर होइन, दायरा विस्तार गर्नुपर्ने उनको भनाइ छ ।
पाण्डेले नीतिगत सुधारलाई अर्थमन्त्रालयले विशेष ध्यान दिनुपर्ने बताए । सरकराले नीतिगत सुधार गर्दै लगानीको वातावरण सहज बनाई सुरक्षाको प्रत्याभूति गर्नुपर्ने उनको भनाई छ ।
