काठमाडौं । सूर्यविनायक-२ बालकोटस्थित खिलुङ्गा कालिका मार्केटिङ प्रालि कारबाहीमा परेको छ। वाणिज्य, आपूर्ति तथा उपभोक्ता संरक्षण विभागले गरेको नियमित बजार अनुगमनका क्रममा कैफियत देखिएपछि उक्त फर्मलाई ५० हजार रुपैयाँ जरिवाना गरिएको हो।
उपभोक्ता संरक्षण ऐन, २०७५ को प्रावधान अनुसार उपभोक्ताको हकहित विपरित कार्य गरेको पाइएकाले सो फर्मलाई तत्कालै जरिवाना गरिएको विभागले जनाएको छ। विभागको टोलीले उक्त फर्मसहित अन्य १२ वटा व्यावसायिक फर्महरूमा पनि स्थलगत अनुगमन गरेको थियो। अनुगमनका क्रममा अन्य फर्महरूमा सामान्य कमजोरी देखिएकाले उनीहरूलाई सुधारका लागि आवश्यक निर्देशन दिइएको छ।
बजारमा हुन सक्ने अस्वभाविक मूल्यवृद्धि, मिसावट र कालोबजारी रोक्न विभागले स्थानीय प्रशासन र उपभोक्ता अधिकारकर्मीको समन्वयमा अनुगमनलाई तीव्र पारेको छ।
