काठमाडौं । स्वास्थ्य बीमा बोर्डले सेवाग्राहीलाई जिम्मेवार रूपमा सेवा लिन, बीमा दुरुपयोग नगर्न र अनावश्यक परीक्षणका लागि चिकित्सक तथा स्वास्थ्यकर्मीमाथि दबाब नदिन आग्रह गरेको छ। साथै, सेवा प्रदायकलाई कानुन, निर्देशिका, कार्यविधि र परिपत्र अनुसार मात्र उपचार गर्न अनुरोध गरेको छ ।
बोर्डका अनुसार सामाजिक स्वास्थ्य बीमा कार्यक्रममार्फत दैनिक करिब ५० हजार नागरिकले स्वास्थ्य सेवा लिइरहेका छन्। यसले दैनिक औसत ८ करोड रुपैयाँ व्यक्तिगत खर्च बचाउँदै वित्तीय सुरक्षा सुनिश्चित गरेको छ।
बोर्डले असहज वा अस्थायी रूपमा बन्द भएका स्वास्थ्य संस्थाहरूलाई पुनः सञ्चालनमा ल्याउन निरन्तर पहल र छलफल गरिरहेको छ। बोर्डले सामाजिक स्वास्थ्य बीमा कार्यक्रमलाई अझ सशक्त, प्रभावकारी र दिगो बनाउने प्रतिबद्धता पनि जनाएको छ।
सामाजिक ऐक्यबद्धताको सिद्धान्तअनुसार वित्तीय व्यवस्थापन गर्दै आम नागरिकलाई गुणस्तरीय स्वास्थ्य सेवा उपलब्ध गराउने लक्ष्यका साथ कार्यक्रम सञ्चालन भइरहेको जनाएको छ।
