काठमाडौं । आईसीसी पुरुष टी–२० विश्वकपको पहिलो वार्मअप खेलमा नेपालले सहज जित निकालेको छ । आज भएको खेलमा नेपालले युएईलाई ७ विकेटले पराजित गरेको हो ।
जितका लागि पाएको १४६ रनको लक्ष्य नेपालले १७ ओभरमा ३ विकेट गुमाएर पुरा गरेको हो । नेपालको जितमा दीप्न्द्र सिए ऐरि र आरिफ शेखले अर्धशतक प्रहार गरे । आरिफले ६१ रन र दीपेन्द्रले ५० रनको अविजति पारी खेले । यी दुईले तेस्रो विकेटका लागि १०३ रनको शतकीय साझेदारी गरे । कुशल भुर्तेल र आशिफ शेख ८ रनमा आउट भए भने कप्तान रोहित कुमार पौडेलले १६ रनको योगदान दिए ।
चेन्नईस्थित एमए चिदम्बरम स्टेडियममा टस हारेर पहिला ब्याटिङ गरेको युएईले निर्धारित २० ओभरमा ६ विकेट गुमाउँदै १४५ रन बनाएको थियो । युएईका सोहेब खानले अविजित रहँदै सर्वाधिक ३८ रन बनाए । हर्षित कौशिकले ३५, ओपनर आर्यन्श शर्मा २५, मुहम्मद जोहैब १९, अलिशान सराफु १२ रनमा आउट भए । नेपालका करण केसी र सन्दीप लामिछानेले समान २ विकेट लिए ।
