काठमाडौं । राष्ट्रिय स्वतन्त्र पार्टी (रास्वपा) ले आफ्नो वाचापत्रमार्फत सेयर बजार सुधारलाई उच्च प्राथमिकतामा राखेको छ। पार्टीले पूँजी बजारलाई पारदर्शी, प्रतिस्पर्धी र प्रविधिमैत्री बनाउँदै आम नागरिकको पहुँच विस्तार गर्ने योजना सार्वजनिक गरेको हो।
रास्वपाले नेपाल स्टक एक्सचेन्ज (नेप्से) र सीडीएस एण्ड क्लियरिङ लिमिटेड (सीडीएससी) को पुनर्संरचना गर्दै निजी क्षेत्रको सहभागिता बढाउने प्रस्ताव अघि सारेको छ। प्रतिस्पर्धात्मक डिजिटल सेवा विकास, छिटो छरितो कारोबार प्रणाली र लगानीकर्तामैत्री संरचना निर्माण गर्ने प्रतिबद्धता पनि जनाएको छ।
संस्थागत लगानी विस्तारका लागि पेन्सन फन्ड, बीमा कम्पनी र म्युचुअल फन्डलाई सक्रिय बनाउने तथा वैकल्पिक लगानीका साधन प्रवर्द्धन गर्ने योजना वाचापत्रमा समेटिएको छ।
रास्वपाले सेयर बजारलाई सीमित समूहको प्रभावबाट मुक्त गर्दै डिजिटल माध्यमबाट युवा तथा सर्वसाधारणसम्म सहज पहुँच पुर्याउने उल्लेख गरेको छ। पार्टीका अनुसार पूँजी बजारलाई देशको आर्थिक वृद्धि र पूँजी निर्माणको मुख्य आधारका रूपमा विकास गरिनेछ।
