काठमाडौं । रूस र युक्रेनबीच जारी युद्धले फेरि एकपटक गम्भीर मोड लिएको छ। पछिल्लो २४ घण्टाभित्र रूसले युक्रेनमाथि ९४८ वटा ड्रोन प्रहार गर्दै युद्ध सुरु भएयताकै सबैभन्दा ठूलो हवाई आक्रमणमध्ये एक गरेको छ । यस घटनालाई विश्लेषकहरूले रूसको नयाँ सैन्य आक्रमण (अफेन्सिभ) सुरु भएको संकेतका रूपमा लिएका छन् ।
युक्रेनका राष्ट्रपति भोलोदिमिर जेलेन्स्कीले देशले अहिले गम्भीर चुनौतीहरूको सामना गरिरहेको बताएका छन् । विशेषगरी हवाई प्रतिरक्षा प्रणालीका लागि आवश्यक मिसाइलको अभाव हुन सक्ने भन्दै उनले चिन्ता व्यक्त गरेका छन् । अमेरिका इरानसँगको द्वन्द्वमा केन्द्रित भइरहेका कारण युक्रेनले अपेक्षित सहयोग समयमै नपाउन सक्ने अवस्था देखिएको उनको भनाइ छ । यसले युक्रेनको सुरक्षा अवस्था अझ जटिल बन्न सक्ने संकेत गर्दछ ।
यस आक्रमणका कारण विभिन्न क्षेत्रमा जनधनको ठूलो क्षति भएको छ । पश्चिमी युक्रेनको इभानो–फ्रान्किभ्स्क सहरमा दुई जनाको ज्यान गएको छ भने विनित्सिया क्षेत्रमा एक जनाको मृत्यु भएको छ । त्यसैगरी, ल्भिभ सहरमा भएको ड्रोन आक्रमणले ऐतिहासिक सम्पदामा समेत असर पुर्याएको छ ।
१७औँ शताब्दीको सेन्ट एन्ड्र्यू चर्च आसपासको युनेस्को विश्व सम्पदा क्षेत्रमा क्षति पुगेको जानकारी प्राप्त भएको छ। युक्रेनकी प्रधानमन्त्री युलिया स्विरिडेन्कोले दिनदहाडै भीडभाड भएको सहरमा आक्रमण हुनु अत्यन्त चिन्ताजनक भएको बताएकी छन् ।
यसअघि रातभरि गरिएको आक्रमणले पनि देशका ११ क्षेत्रमा प्रभाव पारेको थियो, जसमा पाँच जनाको मृत्यु भएको पुष्टि भएको छ। पोल्टाभा, जापोरिज्झिया, खेरसन र खार्किभ जस्ता क्षेत्रहरूमा निरन्तर आक्रमण भइरहेका छन्, जसले युद्धको दायरा अझ फैलिँदै गएको देखाउँछ।
युक्रेनी सेनाका प्रमुख ओलेक्सान्द्र सिर्स्कीका अनुसार रूसले पछिल्ला दिनहरूमा विभिन्न रणनीतिक क्षेत्रमा एकैपटक आक्रमण गर्ने प्रयास गरिरहेको छ । अमेरिकी थिंक ट्यांक इन्स्टिच्युट फर द स्टडी अफ वारले पनि रूसले अग्रपंक्तिमा थप सेना र भारी उपकरण पठाएको उल्लेख गर्दै नयाँ आक्रमण सुरु भइसकेको निष्कर्ष निकालेको छ ।
अर्कोतर्फ, अमेरिका र युक्रेनबीच जारी कूटनीतिक प्रयासहरू पनि निर्णायक चरणमा पुगेका छैनन् । फ्लोरिडामा भएको वार्ताका बाबजुद सुरक्षा ग्यारेन्टीसम्बन्धी सम्झौता अझै अन्तिम रूप लिन सकेको छैन। उक्त सम्झौताले भविष्यमा रूसले पुनः आक्रमण गरेमा अमेरिका तथा अन्य सहयोगी राष्ट्रहरूले युक्रेनलाई सहयोग गर्ने सुनिश्चित गर्ने लक्ष्य राखेको छ।
हाल रूसले युक्रेनको करिब २० प्रतिशत भूभाग नियन्त्रणमा राखेको छ। वसन्त ऋतु सुरु भएसँगै मौसम अनुकूल हुने भएकाले रूसले प्रत्येक वर्ष यस समयमा आफ्नो आक्रमण तीव्र बनाउने गरेको देखिन्छ। यद्यपि, ठूला सहरहरू कब्जा गर्न रूस अझै सफल हुन सकेको छैन र ग्रामीण क्षेत्रमा मात्र सीमित प्रगति हासिल गरेको छ।
