काठमाडौं । काठमाडौं महानगरपालिकाले टुँडिखेलमा सञ्चालन गरिरहेको ‘सिप मेला’ को स्थलगत अवलोकनका लागि आएकी नेपालका लागि अष्ट्रेलियाकी राजदूत फेलिसिटी भोल्कलाई काठमाडौँ महानगरपालिकाकी उपप्रमुख सुनिता डंगोलले स्थलगत जानकारी गराइन्। आज भएको अवलोकन भ्रमणका क्रममा राजदूत भोल्कले, तालिमको पाठ्यवस्तु, सिकाइ प्रक्रिया, श्रम बजारसँगको सम्बन्ध, साझेदारी र यसपछि सञ्चालन हुने क्रियाकलापका विषयमा जिज्ञासा राखेकी थिइन्।
राजदूतका जिज्ञासाको जवाफमा उपप्रमुख डंगोलले, ‘सिप मेला’ सबैलाई समान अवसर प्रदान गर्ने व्यवसायिक पेशाको क्षमता विकास कार्यक्रम भएको बताइन्। ‘तालिम लिएकाहरुलाई रोजगार, स्वरोजगार र अन द जब टे«निङ्मा आवद्ध गराउन तालिमका अन्तिम २ दिन रोजगार मेलाको आयोजना गर्नेछौँ ।’ उनले भनिन्, ‘तालिममा प्रयोगात्मक कक्षा सञ्चालन हुनु महत्वपूर्ण पक्ष हो । प्रयोगात्मक कक्षाबाट विद्यार्थीहरुले अहिले नै देखिने सिप विकास प्रदर्शन गरिसक्नुभएको छ । फलामको घर निर्माण भएको छ । इटाको गारो लगाएर भवनको जग निर्माण भएको छ । टाइल र मार्वल राखेका संरचना निर्माण भएका छन् ।’
अवलोकनका क्रममा राजदूत भोल्कले, मेलाबाट आफू प्रोत्साहित भएको प्रतिक्रिया दिइन्। ‘स्वदेशमा अवसर छन् । म यहीँ केही गर्न सक्छु । यसका लागि मेरो क्षमता छ भन्ने सन्देश, मेलाको महत्वपूर्ण पक्ष हो भन्ने मैले ठानेकी छु ।’ यस्ता तालिमका लागि संघीय सरकारले नीति बनाएर प्रदेश सरकार, स्थानीय सरकार र साझेदार बिच सहकार्य हुने वातावरण तयार गर्न सके प्रभावकारी नतिजा आउने उनको भनाइ थियो ।
त्यस क्रममा महानगरपालिकाका प्रमुख प्रशासकीय अधिकृत, प्रदीप परियारले भने, ‘बेरोजगारलाई श्रम बजार र रोजगारीसँग जोड्नु नै मेला सञ्चालनको उद्देश्य हो । तालिम लिनका लािग स्थानीयबासी, फोहोर प्रभावित क्षेत्रका व्यक्ति र महिलाहरुलाई प्रोत्साहित गरेका छौँ ।’
अवलोकन भ्रमणका क्रममा अन्तरराष्ट्रिय सम्बन्ध सल्लाहकार सन्तोष गिरी, सहरी योजना आयोगका सदस्य इञ्जिनियर शैलेन्द्र झा, मेला व्यवस्थापन निर्देशक समितिका सदस्य सुदीप ढकालले सोधिएका र आफूसँग सम्बन्धित प्रश्नहरुको जवाफ दिएका थिए।
