काठमाडौं । नेपाल क्रिकेट संघ क्यानले आइसीसी मेन्स टी–२० विश्वकप एसिया क्षेत्र छनोट प्रतियोगिताका लागि नेपाली टोलीको घोषणा गरेको छ । क्यानले रोहित कुमार पौडेलको कप्तानीमा शुक्रबार १५ सदस्यीय टोली घोषणा गरेको हो ।
घोषणा गरिएको टोलीमा दीपेन्द्र ऐरी (उपकप्तान), कुशल भुर्तेल, लोकेश बम, कुशल मल्ल, आसिफ सेख, मोहम्मद आदिल आलम, करण केसी, नन्दन यादव, सन्दीप लामिछाने, सन्दीप जोरा, आरिफ सेख, ललित राजवंशी, गुल्शन झा र सोमपाल कामी रहेका छन् ।
छनोट प्रतियोगिता अक्टोबर ८ देखि १७ सम्म ओमानको अल अमेरातस्थित क्रिकेट एकेडेमी मैदानमा हुनेछ । प्रतियोगितामा नेपाल समूह २ मा परेको छ । नेपालले समूह चरणमा कुवेत र जापानसँग प्रतिस्पर्धा गर्नेछ । प्रतियोगितामा एसिया र इस्ट एसिया–प्यासिफिक क्षेत्रबाट छनोट भएका ९ टोली सहभागी छन् । सहभागी टोलीहरू तीन समूहमा विभाजित छन् ।
