काठमाडौं । अन्तर्राष्ट्रिय क्रिकेट परिषद् (आईसीसी) ले पाकिस्तान सरकारले सन् २०२६ को आईसीसी पुरुष टी–२० विश्वकपमा आफ्नो राष्ट्रिय टोलीको सहभागिताबारे व्यक्त गरेको धारणा प्रति औपचारिक प्रतिक्रिया दिएको छ। परिषद्ले उक्त विषयमा पाकिस्तान क्रिकेट बोर्ड (पीसीबी) बाट आधिकारिक जानकारीको प्रतीक्षा गरिरहेको जनाएको छ।
आईसीसीले जारी गरेको अभिव्यक्तिमा विश्वस्तरीय प्रतियोगिताको मूल आधार नै सबै छनोट भएका टोलीले तय गरिएको तालिका अनुसार समान रूपमा प्रतिस्पर्धा गर्नु हो भन्ने उल्लेख गरिएको छ। यस्तो प्रतियोगितामा कुनै सदस्य टोलीले आंशिक रूपमा मात्रै खेल्ने धारणा राख्नु प्रतियोगिताको मर्मसँग मेल नखाने परिषद्को भनाइ छ।
परिषद्का अनुसार आईसीसीका प्रतियोगिताहरू खेल भावना, निष्पक्षता, प्रतिस्पर्धात्मक सन्तुलन र एकरूपतामा आधारित हुन्छन्। कुनै पनि टोलीले पूर्ण रूपमा नखेल्ने अवस्थाले प्रतियोगिताको संरचना, विश्वसनीयता र दर्शकको विश्वासमा असर पार्न सक्ने संकेत आईसीसीले गरेको छ।
आईसीसीले सरकारहरूको नीतिगत भूमिकालाई सम्मान गर्ने स्पष्ट पारे पनि यस्तो निर्णयले विश्व क्रिकेट समुदाय, प्रशंसक तथा स्वयं पाकिस्तानकै क्रिकेट भविष्यमा दीर्घकालीन प्रभाव पार्न सक्ने चिन्ता व्यक्त गरेको छ। विशेषगरी पाकिस्तानभित्र रहेका लाखौँ क्रिकेट समर्थकको हित पनि यससँग जोडिएको परिषद्को भनाइ छ।
परिषद्ले पीसीबीलाई आफ्नै देशको क्रिकेट विकास, अन्तर्राष्ट्रिय सम्बन्ध र समग्र क्रिकेट पारिस्थितिकी तन्त्रमा पर्ने प्रभावबारे गम्भीर रूपमा विचार गर्न आग्रह गरेको छ। आईसीसीले पीसीबीलाई विश्व क्रिकेट प्रणालीको सदस्य र लाभग्राही संस्थाका रूपमा जिम्मेवारीपूर्ण भूमिका निर्वाह गर्नुपर्ने संकेत दिएको छ।
आईसीसीको मुख्य प्राथमिकता भनेको टी–२० विश्वकपलाई सफल रूपमा सम्पन्न गर्नु नै रहेको बताइएको छ। परिषद्ले यसलाई सबै सदस्य संस्थाहरूको साझा जिम्मेवारीका रूपमा लिएको उल्लेख गर्दै पीसीबीसँग सरोकारवाला सबै पक्षको हित सुरक्षित हुने गरी सहमतिमूलक समाधान खोज्न अपेक्षा गरेको छ।
