काठमाडौं । रसुवा बाढीका कारण मृत्यु हुनेको संख्या १,३५७ पुगेको छ भने ५,३२६ जना अझै बेपत्ता छन्। राष्ट्रिय विपद् जोखिम न्यूनीकरण तथा व्यवस्थापन प्राधिकरणले भदौ २३ गते उपरान्ह १ बजेसम्मको अद्यावधिक विवरण सार्वजनिक गर्दै विभिन्न जिल्लाबाट १,३५७ जनाको शव फेला परेको र १३,५८३ जनाको जीवितै उद्धार गरिएको जनाएको छ।
विपद्मा परी ज्यान गुमाएकामध्ये हालसम्म १०२ जनाको मात्र पहिचान भई आफन्तले शव बुझिसकेका छन्। बाँकी शवको सनाखतका लागि सम्बन्धित जिल्ला प्रहरी कार्यालयमा डिएएनए परीक्षण गराउन नमुना दिन आग्रह गरिएको छ। बेपत्ता हुनेहरूमा ८२ जना सुरक्षाकर्मी, ७३ जना सरकारी कर्मचारी, २६ जना बैंक तथा वित्तीय संस्थाका कर्मचारी र ५८७ जना विदेशी पर्यटकसमेत रहेका छन्।
उद्धारका लागि नेपाली सेना, नेपाल प्रहरी र सशस्त्र प्रहरी बलका गरी कुल २१,४०२ जना सुरक्षाकर्मी परिचालन गरिएको छ। हवाई उद्धार तथा राहत सामग्री ढुवानीका लागि नेपाली सेना र निजी क्षेत्रबाट गरी १,४८९ पटकभन्दा बढी हेलिकप्टर उडान गरिसकिएको छ।
प्रभावित क्षेत्रका ३९ वटा होल्डिङ सेन्टरमा ३,५३३ जनालाई आश्रय दिइएको छ भने ६,८२७ जना घाइतेको उपचार भइरहेको छ। सरकारले रसुवा र नुवाकोटमा रु १-१ करोड, धादिङमा रु ५० लाख र प्रभावित १५ पालिकामा रु १३ करोड ५० लाख नगद राहत पठाइसकेको छ। साथै, प्रभावित क्षेत्रमा अत्यावश्यक इन्धन र खाद्य सामग्री ढुवानी गर्नुका साथै १५० जनाभन्दा बढी जनशक्तिमार्फत मनोसामाजिक परामर्श सेवा उपलब्ध गराइएको छ।
