बेइजिङ । चीनले सन् २०२६ का लागि आफ्नो रक्षा बजेट ७ प्रतिशतले वृद्धि गर्ने प्रस्ताव सार्वजनिक गरेको छ। राष्ट्रिय विधायिकामा प्रस्तुत गरिएको बजेट प्रतिवेदनअनुसार आगामी वर्ष चीनले करिब १.९ ट्रिलियन युआन अर्थात् झण्डै २७५ अर्ब अमेरिकी डलर रक्षा क्षेत्रमा खर्च गर्ने योजना बनाएको छ।
पछिल्ला वर्षहरूमा पनि चीनले आफ्नो रक्षा बजेट स्थिर रूपमा बढाउँदै आएको छ। सन् २०२३, २०२४ र २०२५ मा पनि रक्षा बजेट वृद्धि दर करिब ७.२ प्रतिशत रहेको थियो, जसले लगातार धेरै वर्षदेखि एक अङ्कको वृद्धि दर कायम रहेको देखाउँछ। चिनियाँ अधिकारीहरूका अनुसार देशको राष्ट्रिय सुरक्षा सुनिश्चित गर्न, सैन्य क्षमताको आधुनिकीकरण गर्न र बदलिँदो अन्तर्राष्ट्रिय सुरक्षा परिस्थितिसँग सामना गर्न रक्षा बजेट वृद्धि आवश्यक भएको बताइएको छ।
चीनले लामो समयदेखि आफ्नो रक्षा खर्च कुल गार्हस्थ उत्पादनको करिब १.५ प्रतिशतभन्दा कम राख्दै आएको जनाएको छ, जुन विश्वका धेरै देशहरूको तुलनामा कम रहेको दाबी गरिएको छ। सरकारी प्रतिवेदनमा चीनले आफ्नो सार्वभौमसत्ता, भौगोलिक अखण्डता तथा राष्ट्रिय हितको रक्षा गर्न सैन्य शक्ति सुदृढ गर्न आवश्यक रहेको उल्लेख गरिएको छ।
साथै, देशको सेना आधुनिकीकरण गर्ने, प्रविधि विकास गर्ने र सुरक्षा क्षमतामा सुधार ल्याउने उद्देश्यले पनि बजेट वृद्धि गरिएको बताइएको छ। यसैबीच विश्वका धेरै देशहरूले पनि पछिल्ला वर्षहरूमा बढ्दो भू–राजनीतिक तनाव र सुरक्षा चुनौतीका कारण रक्षा बजेट बढाउँदै आएका छन्।
उदाहरणका रूपमा जापानले पछिल्ला वर्षहरूमा लगातार आफ्नो रक्षा बजेट बढाउँदै आएको छ र आगामी वर्षहरूमा पनि सुरक्षा क्षेत्रमा ठूलो लगानी गर्ने योजना बनाएको बताइएको छ। चीनले भने आफ्नो सैन्य नीति रक्षात्मक प्रकृतिको रहेको दोहोर्याउँदै आएको छ। चिनियाँ अधिकारीहरूले देशले विश्व शान्ति कायम राख्न, क्षेत्रीय स्थिरता मजबुत बनाउन तथा अन्तर्राष्ट्रिय सहयोगलाई प्रवर्द्धन गर्न प्रतिबद्ध रहेको बताएका छन्।
