धितोपत्र बजारमा अनियमितता प्रकरण: यी व्यक्ति र संस्था तानिए, दिपक भट्ट मुख्य आरोपि

प्रतिवेदन अनुसार दिपक भट्टले वास्तविक लेनदेन बिना नै उधारोमा सेयर कारोबार गराई मूल्य कृत्रिम रूपमा वृद्धि गर्ने कार्य गरेको पाइएको छ। उनले आफू र आफ्नो परिवारको स्वामित्वमा रहेका विभिन्न कम्पनीहरूबीच आपसी सेयर खरिद–बिक्री गराएर बजारमा अस्वाभाविक उतारचढाव सिर्जना गरेको उल्लेख गरिएको छ। यस्तो गतिविधिले धितोपत्र बजारको वास्तविक आपूर्ति र मागको सन्तुलन बिगारेर लगानीकर्तालाई भ्रममा पार्ने काम गरेको बोर्डको निष्कर्ष छ।

यस प्रकरणमा दिपक भट्टलाई मुख्य आरोपित बनाइएको छ। उनका साथमा अन्य व्यक्तिहरू पनि अनुसन्धान तथा कानुनी प्रक्रियामा तानिएका छन्। तीमध्ये संदीप चाचान (कार्यकारी प्रमुख, भृकुटी स्टक ब्रोकिङ कम्पनी प्रा.लि.), शुभी अग्रवाल (बालुवाटार, काठमाडौं), ऋषि राज मोर (वानेश्वर, काठमाडौं) र राज बहादुर शाह (टौखेल, ललितपुर) रहेका छन्। उनीहरूको भूमिका कारोबार व्यवस्थापन तथा मिलेमतोमा सहयोग गरेको आशंकामा अनुसन्धान भइरहेको छ।

त्यसैगरी केही संस्था तथा व्यक्तिहरूलाई पनि सहयोगी पक्षको रूपमा प्रतिवेदनमा समावेश गरिएको छ। हिमालयन रिइन्स्योरेन्स लिमिटेड, हिमालयन क्यापसर्भ लिमिटेड, हिमालय सेक्युरिटिज बैंकर लिमिटेड, एचएलआई लार्ज क्याप फण्ड, नेपाल माइक्रो इन्स्योरेन्स कम्पनी लिमिटेड, साथै रोहित गुप्ता र शेखर गोल्छा पनि यस प्रकरणमा तानिएका छन्। यी पक्षहरूले प्रत्यक्ष वा अप्रत्यक्ष रूपमा कारोबार संरचना सहज बनाएको आशंका गरिएको छ।

नेपाल धितोपत्र बोर्डले यस प्रकरणलाई धितोपत्र सम्बन्धी ऐन, २०६३ का दफा ९४, ९५ र ९६ अन्तर्गत पर्ने गम्भीर कसूरको रूपमा ठहर गर्दै थप अनुसन्धान तथा कानुनी कारबाही अघि बढाउन सिफारिस गरेको छ।