काठमाडौं । अनलाइन अभियान समूह कक्रोच जनता पार्टी (सीजेपी) का संस्थापक अभिजित दिपकेले संघीय शिक्षा मन्त्री धर्मेन्द्र प्रधानको राजीनामा माग गर्दै आन्दोलनको घोषणा गरेका छन् । उनले देशभरका प्रमुख परीक्षाहरुमा देखिएको अव्यवस्था र अनियमितताका कारण ठूलो संख्यामा विद्यार्थी प्रभावित भएको दाबी गरेका छन् ।
दिपकेका अनुसार हालसम्म करिब ८ लाख मानिसहरुले मन्त्रीको राजीनामा माग गर्दै अनलाइन याचिकामा हस्ताक्षर गरेका छन्। उनले एनईईटी (NEET), सीबीएसई (CBSE), सीयूईटी (CUET) र एसएससी (SSC) जस्ता प्रमुख परीक्षामा देखिएका समस्या, पेपर लिकको आरोप तथा प्राविधिक त्रुटिका कारण १ करोडभन्दा बढी विद्यार्थी प्रभावित भएको बताएका छन् ।
सामाजिक सञ्जाल प्लेटफर्म एक्स (पूर्व ट्विटर) मा सार्वजनिक गरिएको भिडियो सन्देशमार्फत दिपकेले आफू जुन ६ मा भारत फर्किने र त्यसपछि दिल्लीमा प्रत्यक्ष विरोध प्रदर्शन गर्ने घोषणा गरेका छन् । उनका अनुसार आन्दोलनको सुरुवात दिल्ली विमानस्थलबाट हुनेछ र त्यसपछि समर्थकहरु जंतर मंतरमा शान्तिपूर्ण प्रदर्शनका लागि अनुमति लिन अघि बढ्नेछन् ।
दिपकेले परीक्षा प्रणालीमा बारम्बार देखिएका कमजोरी र प्रशासनिक असफलताका कारण विद्यार्थीहरुको भविष्यमा गम्भीर असर परेको आरोप लगाउँदै शिक्षा मन्त्रीले जिम्मेवारी लिनुपर्ने बताएका छन् । उनले यदि मन्त्रीले राजीनामा नदिए भने देशमा जवाफदेहिताको अभाव देखिने चेतावनीसमेत दिएका छन् ।
यसैबीच, देशका विभिन्न राजनीतिक दल र विद्यार्थी समूहहरुले पनि परीक्षामा देखिएका अनियमितता, व्यवस्थापन कमजोरी र विवादलाई लिएर सरकारको आलोचना गर्दै आएका छन् । हालसम्म सम्बन्धित सरकारी निकायले यस विषयमा कुनै औपचारिक प्रतिक्रिया नदिएको हिन्दुस्तान टाइम्सले जनाएको छ ।
