काठमाडौं । फिफा विश्वकप २०२६ को समूह अन्तिम खेलमा साविक विजेता अर्जेन्टिनाले जर्डनलाई ३–१ गोल अन्तरले पराजित गरेको छ। अमेरिकाको टेक्सासस्थित डलास स्टेडियममा भएको उक्त प्रतिस्पर्धामा अर्जेन्टिनाका लागि जियोभानी लो सेल्सोले १८औं मिनेटमा सुरुवाती गोल गरे भने ३१औं मिनेटमा लाउटारो मार्टिनेजले पेनाल्टीमार्फत टोलीको अग्रता दोब्बर बनाएका थिए।
दोस्रो हाफको ५५औं मिनेटमा जर्डनका मुसा अल–तामारीले गोल गर्दै खेललाई २–१ को स्थितिमा ल्याएर चुनौती दिए पनि खेलको ८०औं मिनेटमा बेन्चबाट मैदान प्रवेश गरेका कप्तान लियोनेल मेस्सीले उत्कृष्ट गोल गर्दै अर्जेन्टिनाको जित सुनिश्चित गरे।
यस ऐतिहासिक गोलसँगै मेस्सी विश्वकप इतिहासमा लगातार ७ खेलमा गोल गर्ने विश्वकै पहिलो खेलाडी बनेका छन्, जसको सुरुआत सन् २०२२ को कतार विश्वकपको नकआउट चरणदेखि भएको थियो र यस कीर्तिमानसँगै विश्वकपमा उनको कुल गोल संख्या १९ पुगेको छ।
