काठमाडौं । एमजी (मोरिस ग्यारेज) ब्राण्डका सवारी साधनको आधिकारिक वितरक प्यारामाउन्ट मोटर्स प्रालिको छोटो अवधिको कर्जा सीमाका लागि रेटिङ एजेन्सी इक्रा नेपालले [ICRANP] A4 रेटिङलाई पुनः पुष्टि गरेको छ। कम्पनीले १ अर्ब ८० करोड रुपैयाँको बैंक ऋणका लागि गराएको यो रेटिङले तीव्र प्रतिस्पर्धा र आर्थिक मन्दीका बाबजुद कम्पनीको बलियो बजार उपस्थितिलाई दर्शाउँछ।
अनुभवी व्यवस्थापन टोली, इलेक्ट्रिक गाडी (ईभी) बजारमा मजबुत पकड र देशका प्रमुख सहरहरूमा फैलिएका ३ वटा आफ्नै अत्याधुनिक शोरुम तथा १५ वटा डिलरहरूको सुदृढ सञ्जालका कारण कम्पनीले आर्थिक वर्ष २०२५ मा आफ्नो राजस्व धेरै हदसम्म कायम राख्न सफल भएको छ। साथै, मुख्य उत्पादक मोरिस ग्यारेजद्वारा निरन्तर नयाँ मोडलहरू बजारमा ल्याइनु र नेपाल सरकारले परम्परागत इन्धन गाडीको तुलनामा ईभीलाई कम भन्सार दरमार्फत प्रोत्साहन दिइरहनुले कम्पनीको व्यावसायिक सञ्चालनलाई थप राहत मिलेको छ।
वित्तीय विवरण अनुसार प्यारामाउन्ट मोटर्सले आर्थिक वर्ष २०२४ मा ४ अर्ब १२ करोड ५० लाख रुपैयाँ र आर्थिक वर्ष २०२५ मा ३ अर्ब ५६ करोड ५० लाख रुपैयाँको व्यापार गरेकोमा चालू आर्थिक वर्ष २०८२/८३ को पहिलो नौ महिनामा करिब २ अर्ब ४० करोड ७० लाख रुपैयाँको कारोबार गर्दै आफ्नो व्यावसायिक गतिलाई पुनः सुधारको दिशामा अग्रसर गराएको छ।
वित्तीय सूचकांकहरुका आधारमा कम्पनीको सञ्चालन मुनाफा आर्थिक वर्ष २०२५ को ५.२ प्रतिशतबाट बढेर चालू वर्षको नौ महिनामा ६.० प्रतिशत पुगेको छ। कम्पनीको कारोबार वृद्धिमा नयाँ मोडलहरूको योगदान उल्लेखनीय रहेको छ, जसमा ‘एमजी एस५’ मोडलले मात्रै आर्थिक वर्ष २०२५ को कुल आम्दानीमा ४२ प्रतिशत हिस्सा ओगटेको थियो भने हालै बजारमा ल्याइएको ‘एमजी एस६’ ले आगामी दिनमा व्यापारलाई थप उचाइमा पुर्याउने अपेक्षा गरिएको छ।
एमजीका अतिरिक्त कम्पनीले जापानी ब्राण्ड ‘माज्दा’ र चिनियाँ ईभी ब्राण्ड ‘उलिङ’ (जसको मिनी–ईभी बजारमा किफायती र भरपर्दो विकल्प बनेको छ) का सवारी साधन पनि बिक्री-वितरण गर्दै आएको छ भने विश्वप्रसिद्ध लक्जरी ब्राण्ड ‘मर्सिडिज बेन्ज’को आधिकारिक सेवा केन्द्र सञ्चालन गर्ने तयारीले यसको व्यावसायिक पोर्टफोलियोलाई थप व्यापक बनाउने देखिन्छ।
कम्पनीले मार्च २०२५ मा नयाँ मोडेल ‘एमजी एस५’ थपेको थियो, जसले आर्थिक वर्ष २०२५ को कुल राजस्वमा करिब ४२% योगदान पुर्यायो। त्यसैगरी, हालै बजारमा ल्याइएको नयाँ मोडेल ‘एमजी एस६’ को आगमनले थप बिक्री वृद्धिमा सहयोग पुर्याउने अपेक्षा गरिएको छ।
Photo: lunching of MG S6
यसबाहेक, कम्पनीले हालै वुलिङ ब्रान्डसँग केही थप मोडेलहरू सार्वजनिक गर्ने सम्झौता गरेको छ; जसमा राम्रो विशेषता भएको र बजारमा सीमित प्रतिस्पर्धीहरू रहेको ‘फोर-डोर मिनी-ईभी’ समेत समावेश छ, जसले आगामी वर्षमा कम्पनीको राजस्व वृद्धिलाई टेवा पुर्याउन सक्छ। साथै, नेपालमा ‘मर्सिडीज बेन्ज’ ब्रान्डका सवारी साधनका लागि नयाँ आधिकारिक सर्भिस सेन्टर थप्ने योजनासहितका कम्पनीका व्यवसाय विविधीकरणका प्रयासहरूले आगामी दिनमा थप राजस्व वृद्धिलाई सहयोग पुर्याउने अपेक्षा गरिएको छ, यद्यपि यो कस्तो रहला भन्ने कुरा हेर्न बाँकी नै छ।
यद्यपि, बजारमा बढ्दो तीव्र प्रतिस्पर्धा र मूल्यको दबाबले गर्दा कम्पनीको सञ्चालन नाफा मार्जिन ५.२ प्रतिशतमा खुम्चिनु, वर्षको अन्त्यतिर ठूलो परिमाणमा सामान मौज्दात (स्टक) रहँदा बैंक ऋणको भार बढेर ब्याज तिर्न सक्ने क्षमता १.३ गुणामा झर्नु, र कुल आम्दानीको करिब ८७ प्रतिशत हिस्सा दुईवटा मोडलमा मात्रै निर्भर हुनु कम्पनीका मुख्य चिन्ता र व्यावसायिक जोखिमका पाटाहरू हुन्। तथापि, आगामी दिनमा नयाँ प्रतिस्पर्धी ब्राण्डहरूको प्रवेश र नीतिगत परिवर्तनका सम्भावित चुनौतीहरू रहे तापनि कम्पनीको स्थापित वितरण सञ्जाल, अन्तर्राष्ट्रिय ब्राण्डसँगको मजबुत साझेदारी र नवीन मोडलहरूको निरन्तर आगमनले प्यारामाउन्ट मोटर्सको व्यावसायिक भविष्यलाई सुरक्षित र सकारात्मक बनाएको इक्रा नेपालको प्रतिवेदनमा उल्लेख गरिएको छ।
