काठमाडौं ।फिफा (FIFA) ले विश्वकप फाइनललगत्तै स्पेनका खेलाडीहरूलाई प्रहार गरेको भन्दै अर्जेन्टिनाका दुई खेलाडीहरूविरुद्ध अनुशासनात्मक कारबाही अघि बढाएको छ। साथै, प्रतियोगिताको सेमिफाइनलमा इंग्ल्यान्डलाई पराजित गरेपछि खेलाडीहरूले फकल्यान्ड टापु सम्बन्धी राजनीतिक ब्यानर प्रदर्शन गरेकोमा अर्जेन्टिनाको फुटबल फेडेरेसनमाथि पनि मुद्दा दर्ता गरेको छ।
बुधबार फिफाले अर्जेन्टिनाविरुद्ध दर्ता गरेका अनुशासनात्मक मुद्दाहरूको सूचीमा समर्थकहरूद्वारा गरिएका “भेदभावपूर्ण नारा तथा इसाराहरू”, फाइनलपछि सहायक प्रशिक्षकद्वारा गरिएको भनिएको आक्रमण, र विश्वकपका “विभिन्न खेलहरूका क्रममा दर्शकहरूले वस्तुहरू प्रहार गरेको” विषय समावेश छन्।
जुलाई १९ मा भएको खेलमा स्पेनसँग १-० को हारपछि भएको झडपमा अर्जेन्टिनाका मिडफिल्डर लिआन्द्रो पारेदेसले आक्रमणका तीनवटा आरोप, डिफेन्डर नाह्युएल मोलिनाले दुईवटा आरोप र सहायक प्रशिक्षक रोबर्टो आयालाले एउटा आरोपको सामना गरिरहेका छन्।
मोलिना र थियागो अल्माडा माथि खेल भावनाविपरीतको व्यवहार गरेको आरोप लगाइएको छ भने स्पेनका खेलाडी गाभी माथि पनि सोही आरोप छ।
सेमिफाइनलमा इंग्ल्यान्डलाई २-१ ले हराएपछि अर्जेन्टिनाका खेलाडीहरूले “लास माल्भिनास सोन आर्जेन्टिनास” (“माल्भिनास अर्जेन्टिनाको हो”) लेखिएको नारासहितको ब्यानर बोकेका थिए।
अर्जेन्टिनाले फकल्यान्ड टापुलाई ‘इस्लास माल्भिनास’ भनेर सम्बोधन गर्दछ। सन् १९८२ मा अर्जेन्टिनाको तत्कालीन सैन्य तानाशाहीको आदेशमा उक्त टापुमा आक्रमण गरिएको थियो, जसले १० हप्ता लामो युद्धको रूप लियो र अन्ततः बेलायतले जीत हासिल गर्यो।
ब्रिटिस सरकारी अधिकारीहरूले फिफालाई यस विषयमा छानबिन गर्न आग्रह गरेका थिए। फुटबलको सर्वोच्च निकाय फिफाले बुधबार औपचारिक रूपमा “गैर-खेलकुद प्रकृतिका प्रदर्शनका लागि खेलकुद प्रतियोगिताको प्रयोग गरेको” आरोप लगाइएको जानकारी दिएको छ।
फिफाका अनुसार आरोप लागेका सबै व्यक्तिहरूलाई “आफ्नो धारणा राख्ने अवसर प्रदान गरिएको छ, जसपश्चात् फिफा अनुशासनात्मक समितिले उचित समयमा निर्णय सार्वजनिक गर्नेछ।”
