काठमाडौं । जापानमा जारी २०औँ एसियाली खेलकुद (एशियाड) अन्तर्गत पुरुष क्रिकेटको क्वाटरफाइनलमा नेपालको यात्रा समाप्त भएको छ। मङ्गलबार श्रीलङ्काविरुद्ध तय भएको क्वाटरफाइनल खेल अविरल वर्षाका कारण टस समेत हुन नसकी रद्द भएपछि नेपाल प्रतियोगिताबाट बाहिरिएको हो। प्रतियोगिताको नियमअनुसार खेल रद्द भएपछि उच्च वरियता का आधारमा श्रीलङ्का सेमिफाइनलमा प्रवेश गरेको छ भने नेपाल प्रतियोगिताबाट बाहिरिन पुगेको छ।
समूह ‘ए’ मा रहेको नेपालले सानदार प्रदर्शन गर्दै समूह विजेताका रूपमा अन्तिम आठ (क्वाटरफाइनल) मा स्थान बनाएको थियो। नेपालले समूह चरणको पहिलो खेलमा अफगानिस्तानलाई ५ विकेटले पराजित गर्दै उत्कृष्ट सुरुआत गरेको थियो भने दोस्रो खेलमा घरेलु टोली जापानविरुद्ध १५ ओभरमा १४९/४ रनको बलियो योगफल खडा गरे पनि लगातारको वर्षाका कारण खेल रद्द भई अंक बाँडिएको थियो, जसका कारण २ खेलबाट ३ अंक जोड्दै नेपाल समूह ‘ए’ को विजेता बनेर क्वाटरफाइनल पुगेको थियो।
वर्षाका कारण क्वाटरफाइनलका खेलहरू प्रभावित भएपछि वरियताका आधारमा सेमिफाइनल पुग्ने टोलीहरूको टुंगो लागेको छ, जसमा अफगानिस्तानविरुद्धको खेल वर्षाले रद्द भएपछि उच्च वरियताका आधारमा भारत सेमिफाइनल पुगेको हो र अब पहिलो सेमिफाइनलमा भारतले श्रीलङ्काको सामना गर्नेछ भने हङकङविरुद्धको खेल रद्द भएपछि पाकिस्तान पनि सेमिफाइनल पुगिसकेको हुनाले उसले बङ्गलादेश र मलेसियाबीचको क्वाटरफाइनल विजेतासँग दोस्रो सेमिफाइनलमा प्रतिस्पर्धा गर्नेछ।
