काठमाडौं । कतारको दोहामा जारी एसीसी मेन्स एसिया कप राइजिङ स्टार्स क्रिकेट प्रतियोगितामा नेपालले आज शुक्रबार भारत ‘ए’ सँग खेल्दैछ। समूह ‘बी’ अन्तर्गतको यो खेल नेपाली समयअनुसार दिउँसो ३ः४५ बजे वेस्ट इन्ड पार्क अन्तर्राष्ट्रिय क्रिकेट रंगशालामा सुरु हुँदैछ। टस जितेर नेपालले पहिले फिल्डिङ गर्ने निर्णय गरेको छ।
सन्दीप लामिछानेको कप्तानीमा रहेको नेपालले प्रतियोगितामा पहिलो खेल खेल्न लागेको हो। प्रतियोगिताको सुरुआतमै नेपालले बलियो प्रतिद्वन्द्वी भारत ‘ए’ को सामना गर्न लागेको छ। भारतीय टोलीमा सिनियर अन्तर्राष्ट्रिय क्रिकेट र इन्डियन प्रिमियर लिग (आईपीएल) खेलिसकेका अनुभवी खेलाडी छन्।
भारत ‘ए’ को कप्तानी तिलक वर्माले गरिरहेका छन्। टोलीमा उपकप्तान रिंकु सिंह, अभिषेक शर्मा, वैभव सूर्यवंशी, प्रभसिमरन सिंह र हर्षित राणालगायत खेलाडी छन्। आक्रामक ब्याटिङ र बलिङका पर्याप्त विकल्प भएको भारतीय टोलीलाई रोक्नु नेपालका लागि मुख्य चुनौती हुनेछ।
नेपालले सन्दीपको कप्तानीमा १५ सदस्यीय टोली घोषणा गरेको छ। टोलीमा कुशल भुर्तेल, ललित राजवंशी, पवन सर्राफ, सन्दीप जोरा, देव खनाल, इशान पाण्डे, लोकेश बम, प्रतिश जिसीलगायत खेलाडी छन्। अर्जुन कुमाल, वसिर अहमद, नन्दन यादव, राशिद खान, दीपक डुम्रे, अभिषेक गौतम र मयन यादव पनि टोलीमा छन्।
नेपालले भारत ‘ए’ विरुद्ध कसिलो बलिङ र अनुशासित ब्याटिङ गर्दै जितको लक्ष्य राखेको छ। समूह चरणमा नेपालले भारतपछि नोभेम्बर २२ मा यूएई र नोभेम्बर २४ मा पाकिस्तान ‘ए’ सँग खेल्नेछ।
समूह ‘बी’ मा नेपाल, भारत ‘ए’, पाकिस्तान ‘ए’ र यूएई छन्। शुक्रबार नै समूहको अर्को खेलमा पाकिस्तान ‘ए’ र यूएई प्रतिस्पर्धा गरिरहेका छन्। टस जितेर यूएईले फिल्डिङ रोजेपछि पाकिस्तान ‘ए’ ले पहिले ब्याटिङ गरिरहेको छ।
प्रतियोगितामा आठ टोली सहभागी छन्। समूह ‘ए’ मा श्रीलंका ‘ए’, बंगलादेश ‘ए’, अफगानिस्तान ‘ए’ र हङकङ छन्। समूह चरणका खेलपछि दुवै समूहका शीर्ष दुई टोली सेमिफाइनलमा पुग्नेछन्।
प्रतियोगिताको पहिलो सेमिफाइनल नोभेम्बर २६, दोस्रो सेमिफाइनल नोभेम्बर २७ र फाइनल नोभेम्बर २९ मा हुनेछ। यसपटक प्रतियोगिता टी–२० को सट्टा ५० ओभरको एकदिवसीय प्रारूपमा आयोजना भइरहेको छ।



