काठमाडौं । नेपाल राष्ट्र बैंकले आज (पुस ७ गते) बजारबाट ६० अर्ब रुपैयाँ उठाउने भएको छ। बजारमा अत्यधिक तरलता (तरल रकमको बढी आपूर्ति) रहेको अवस्थामा राष्ट्र बैंकले यो कदम चाल्न लागेको हो।
राष्ट्र बैंकका अनुसार यो रकम २१ दिनको अवधिका लागि उठाइनेछ। बैंक तथा वित्तीय संस्थाहरुले पुस ७ गते राष्ट्र बैंकमा रकम राख्नेछन् भने उठाइएको रकमको साँवा र ब्याज पुस २८ गते फिर्ता गरिनेछ।
राष्ट्र बैंकले क, ख, र ग वर्गका बैंक तथा वित्तीय संस्थाहरुलाई न्यूनतम १० करोड रुपैयाँदेखि अधिकतम ५ अर्ब रुपैयाँसम्म निक्षेप राख्न अनुमति दिएको छ। यो रकम “बोल कबोल” प्रक्रियामार्फत निर्धारण गरिने ब्याजदरमा आधारित हुनेछ।
बैंक तथा वित्तीय संस्थाहरुले राख्ने निक्षेपमा सबैभन्दा कम ब्याजदर कबोल गर्ने संस्थाहरुको प्रस्तावलाई प्राथमिकता दिइनेछ। यसरी कबोल गरिएका निक्षेपहरु राष्ट्र बैंकले स्वीकार गर्नेछ।
तरलता व्यवस्थापनका लागि यो कदम राष्ट्र बैंकको नियमित नीतिगत प्रक्रिया अन्तर्गत गरिएको बताइएको छ। यसबाट बजारमा रहेका तरल रकमको आपूर्ति सन्तुलनमा ल्याउन सहयोग पुग्ने राष्ट्र बैंकले विश्वास लिएको छ।
