काठमाडौं ।पछिल्लो समय मासुको आयात बढेको छ । चालु आर्थिक वर्षको सात महिनाको अवधिमा ४ हजार ३२९ किलोग्राम खसी र भेडाको मासु आयात गरिएको भन्सार विभागले जनाएको छ । विभागका अनुसार उक्त अवधिमा ८९ लाख ३१ हजार बराबरको उक्त मासु पछिल्लो सात महिनामा आयात गरिएको हो ।
सरकारले मासुजन्य पदार्थमा आत्मनिर्भर बन्ने बताइरहँदा उक्त परिणमा र मूल्य बराबरको मासु आयात भएको हो । खसी र भेडाका मासुका साथै सो अवधिमा विभिन्न प्रकारका माछा र सामुन्द्रिक जीवहरु समेत आयात गरिएको छ ।
विभागका अनुसार सात महिनाको अवधिमा २३ लाख ६२ हजार मूल्य बराबरको अक्टोपस आयात गरिएको छ । उक्त मूल्य बराबरको ३ हजार ५१५ किलोग्राम अक्टोपस आयात गरिएको हो । पछिल्लो समय नेपालीहरु सामुन्द्रिक खानामा आर्कषण बढे सँगै यसको आयातमा वृद्धि भएको हो । नेपालका विभिन्न होटल तथा रेष्टुरेन्टहरुमा सामुन्द्रिक खाना अर्थात् अक्टोपस, क्याटफिस , गँगटो लगायतका परिकार रुचाउनेको संख्या बढे सँगै आयातमा समेत वृद्धि भएको सरोकारावालाहरु बताउँछन् ।
