काठमाडौं । अर्थमन्त्रालयले ६५ वर्ष नाघेकाले पनि गभर्नर बन्न पाउनेगरी मापदण्ड परिवर्तन गरेको छ ।
सोमबार अर्थमन्त्रालयद्वारा सार्वजनिक नेपाल राष्ट्र बैंकको गभर्नर, नेपाल स्टक एक्सचेन्जको प्रमुख कार्यकारी अधिकृतलगायतको नियुक्तिसम्बन्धी मापदण्डमा उमेरहद हटाइएको हो । ‘अर्थ मन्त्रालयसम्बद्ध सार्वजनिक निकायका पदाधिकारी तथा सदस्यको नियुक्ति र मनोनयनसम्बन्धी मापदण्ड २०७३’ मा यसअघि कार्यकारी प्रमुखको ३० वर्ष र अन्य पदाधिकारी र सदस्यको ३० वर्ष पूरा भइ ६५ वर्ष ननाघेको हुनुपर्ने व्यवस्था रहेकोमा संशोधित नियुक्तिसम्बन्धी मापदण्डमा उक्त व्यवस्था नै हटाइएको हो ।
२०७६ चैत २४ गते ५ वर्षका लागि महाप्रसाद अधिकारी गभर्नर नियुक्त भएकोमा आगामी चैत २३ गते उनको कार्यकाल सकिँदैछ । गभर्नरको कार्यकाल सकिनुभन्दा एक महिनाअघि नै नियुक्ति हुनुपर्ने कानुनी प्रावधान रहेकोमा हालसम्म पनि गभर्नर नियुक्ति हुन सकेको छैन ।
सोमबार बसेको मन्त्रिपरिषद् बैठकले गभर्नर नियुक्त गर्ने अनुमान धेरैको रहे पनि प्रधानमन्त्रीको थाईल्याण्ड भ्रमणअघि गभर्नर नियुक्त नहुने देखिएको छ । प्रधानमन्त्री केपी शर्मा ओली आज थाइल्याण्डको औपचारिक भ्रमणमा जाँदैछन् । बहुक्षेत्रीय प्राविधिक तथा आर्थिक सहयोगका लागि बङ्गालको खाडीको प्रयास (बिम्स्टेक) को छैटौँ शिखर सम्मेलनमा भाग लिने क्रममा बैंककमा रहँदा सो संस्थामा सम्बोधन गर्ने कार्यक्रम रहेको छ । प्रधानमन्त्री ओली आगामी चैत २३ गते स्वदेश फर्किने कार्यक्रम रहेकोमा अधिकारीको कार्यकाल सकिनुअगावै गभर्नर नियुक्तिको सम्भावना भने रहेको देखिन्छ ।
११ चैतमा बसेको मन्त्रिपरिषद्को बैठकले राष्ट्र बैंकको गभर्नर नियुक्तिको सिफारिस गर्न उपप्रधान तथा अर्थमन्त्री विष्णुप्रसाद पौडेलको अध्यक्षतामा पूर्वगभर्नर विजयनाथ भट्टराई र राष्ट्रिय योजना आयोगका पूर्वउपाध्यक्ष विश्व पौडेल सदस्य रहने गरी सिफारिस समिति गठन गरेको छ । उक्त समितिको सिफारिसअनुसार गभर्नर नियुक्तिको प्रक्रिया अघि बढ्नेछ ।
उमेरहद हटाउनेगरी संशोधित मापदण्ड
