काठमाडौं । बैंक तथा वित्तीय संस्था परिसंघ नेपाल (सीबीफीन) ले औपचारिक रूपमा बजेटको स्वागत गरेको छ । आइतबार एक विज्ञप्ति जारी गर्दै सीबीफीनले हालै प्रस्तुत आगामी आर्थिक वर्ष २०८३/८४ को बजेटमार्फत आर्थिक पुनरुत्थान, निजीक्षेत्रको मनोवल अभिवृद्धि, लगानी प्रवर्धन तथा उत्पादनमुखी अर्थतन्त्र निर्माणको दिशामा अघि सारिएको बताउँदै नीतिगत तथा संरचनागत सुधारका पहल गरिएको जनाएको हो ।
‘विगत केही समयदेखि सुषुप्त अवस्थामा रहेको मुलुकको अर्थतन्त्र एवं आर्थिक गतिविधि, निजीक्षेत्रको कमजोर आत्मविश्वास, लगानीकर्तामा देखिएको ‘पर्ख र हेर’ को मनोवृत्ति, बैंकिङ क्षेत्रबाट अपेक्षित कर्जा विस्तार हुन नसकेको अवस्था तथा बढ्दो खराब कर्जाको चुनौतीबाट प्रभावित हुँदै आएको सन्दर्भमा प्रस्तुत बजेटले अर्थतन्त्र र आर्थिक गतिविधिलाई पुनःचलायमान बनाउने आशा र विश्वासको नयाँ आधार सिर्जना गरेको सीबीफीनको ठहर गरेको छ,’ जारी विज्ञप्तिमा भनिएको छ ।
विशेषगरी कर प्रणालीमा गरिएको सुधार, उद्योग व्यवसायलाई प्रदान गरिएका सहुलियत, डिजिटल अर्थतन्त्रको प्रवर्धन, प्रविधि एवं पूर्वाधार विकासमा प्राथमिकता, ऊर्जा क्षेत्रको विकासमा जोड, लगानीमैत्री नीति निर्माण तथा वातावरणको सिर्जना तथा बैंकिङ क्षेत्रमा निकै चुनौतीपूर्ण बन्दै गएको खराब कर्जा तथा गैर बैंकिङ सम्पत्तिको कुशल व्यवस्थापनका लागि विशेष अधिकारयुक्त राष्ट्रिय सम्पत्ति व्यवस्थापन कम्पनीको स्थापना गरिने ऐतिहासिक घोषणा अत्यन्तै दुरदर्शी, सकारात्मक एवं समयसापेक्ष कदम रहेको सीबीफीनले उल्लेख गरेको छ ।
साथै बजेटले निजीक्षेत्रलाई आर्थिक वृद्धिको प्रमुख साझेदार र संवाहकको रूपमा आत्मसाथ गर्दै लगानी, उद्यमशीलता, नवप्रवर्तन तथा वित्तीय पहुँच विस्तारलाई प्राथमिकतामा राखेको स्पष्ट देखिन्छ ।
व्यक्तिगत आयकरमा छुटको सीमामा वृद्धि, करको दरमा पुनरावलोकन, औद्योगिक कच्चा पदार्थमा भन्सार सहजीकरण तथा वैकल्पिक वित्तीय उपकरणमार्फत पुँजी परिचालनका व्यवस्थाहरूले समग्र आर्थिक गतिविधिहरूमा सकारात्मक ऊर्जा सञ्चार गर्ने विश्वास गरिएको छ । साथै, प्रस्तुत बजेटले आन्तरिक तथा बाह्य लगानी विस्तार, उद्यमशीलताको विकास, रोजगारी सिर्जना, उत्पादन अभिवृद्धि, निजीक्षेत्रको पुनर्जागरणसहित उच्च आर्थिक आत्मविश्वासतर्फ अर्थतन्त्रलाई अग्रसर गराउने महत्त्वपूर्ण आधार निर्माण गर्ने सीबीफीनले विश्वास व्यक्त गरेको छ ।
बजेटमा उल्लेखित जनमुखी र विकासमुखी नीति तथा कार्यक्रमहरूको प्रभावकारी र परिणामुखी कार्यान्वयनका लागि नीतिगत स्थायित्वसहित निजीक्षेत्रसँगको सहकार्यलाई केन्दविन्दुमा राखेर नेपाल सरकार अगाडि बढ्ने हार्दिक अपेक्षा व्यक्त गर्दै, आर्थिक पुनरुत्थान, वित्तीय क्षेत्रको स्थायित्व एवं दिगो विकास, लगानी विस्तार, दिगो र उच्च आर्थिक वृद्धिसहित सुदृढ एवं आत्मनिर्भर अर्थतन्त्र एवं समृद्ध राष्ट्र निर्माणको कार्यमा नेपाल सरकारसँग निकट सहकार्य गर्न र एक अभिन्न सहयोगीको भूमिका निर्वाह गर्न सीबीफीन पूर्णरूपमा प्रतिबद्ध रहेको पनि सीबीफीनले उल्लेख गरेको छ ।
