काठमाडौं । भारतका केन्द्रीय शिक्षामन्त्री धर्मेन्द्र प्रधानले आफ्नो पदबाट राजीनामा दिएका छन्। उनले प्रधानमन्त्री नरेन्द्र मोदीलाई राजीनामा बुझाउँदै आफूले विद्यार्थी, शिक्षक र शिक्षा क्षेत्रप्रति पूर्ण समर्पणका साथ काम गरेको उल्लेख गरेका छन्।
राजीनामा पत्रमा प्रधानले लेखेका छन्, “म सधैं विद्यार्थी, शिक्षक र शिक्षा क्षेत्रप्रति समर्पित रहँदै आएको छु। तर जन्तर–मन्तरमा विकसित भएको परिस्थितिलाई ध्यानमा राख्दै मैले नैतिक जिम्मेवारीस्वरूप शिक्षामन्त्री पदबाट राजीनामा दिने निर्णय गरेको छु।”
एनईईटी–यूजी प्रश्नपत्र चुहावटलगायत परीक्षामा भएका अनियमितताका विषयमा आफ्नो राजीनामाको माग गर्दै दिल्लीमा विद्यार्थीहरूले लगातार केही सातादेखि व्यापक प्रदर्शन गरेपछि शिक्षामन्त्री धर्मेन्द्र प्रधानले शनिबार पदबाट राजीनामा दिएका छन्।
प्रधानले सन् २०२६ मे ३ मा सञ्चालन भएको एनईईटी–यूजी (NEET-UG) परीक्षामा अनियमितता सार्वजनिक हुनासाथ भारत सरकारले तत्काल त्यसको संज्ञान लिएको बताएका छन्।
उनले भने, “एनईईटी–यूजी परीक्षामा अनियमितता देखिएपछि भारत सरकारले तत्काल छानबिनको जिम्मा केन्द्रीय अनुसन्धान ब्युरो (CBI) लाई दिएको थियो। उक्त परीक्षा रद्द गरियो र पुनः परीक्षा सञ्चालनको नयाँ मिति घोषणा गरियो। साथै, आगामी वर्षदेखि यो परीक्षा कम्प्युटर–आधारित परीक्षा (CBT) प्रणालीमार्फत सञ्चालन गर्ने निर्णय पनि गरिएको छ।”
प्रधानले केही व्यक्तिहरूले विद्यार्थीलाई भ्रममा पार्ने प्रयास गरेको आरोप पनि लगाएका छन्।
उनले भने, “पहिलो दिनदेखि नै मैले यस विषयको जिम्मेवारी लिएको थिएँ र कहिल्यै त्यसबाट पछि हटिनँ। मेरो दृढ संकल्प थियो कि परीक्षा माफियाका कारण कुनै पनि मेधावी विद्यार्थीको भविष्य नबिग्रियोस् र कुनै विद्यार्थीमाथि अन्याय नहोस्। जुलाई १६ मा सार्वजनिक गरिएको एनईईटी–यूजीको नतिजा सन्तोषजनक थियो, जसमा विपन्न परिवारका धेरै मेधावी विद्यार्थीले पनि सफलता हासिल गरेका छन्।”
प्रधानका अनुसार यस अवधिमा पनि जिम्मेवार पदमा रहेका केही व्यक्तिहरूले विद्यार्थीलाई भ्रमित पार्ने र प्रक्रिया अवरुद्ध गर्ने प्रयास गरे, जसले उनलाई अत्यन्त दुःखी बनाएको छ।
उनले लेखेका छन्, “म लोकतन्त्रको शक्तिप्रति सदैव अटल विश्वास राख्ने व्यक्ति हुँ। युवाहरूका आकांक्षा, सपना र अपेक्षाप्रति मेरो गहिरो सम्मान छ। उनीहरू भारतको भविष्य मात्र होइनन्, नयाँ र विकसित भारतका वाहक, निर्माता र शिल्पकार पनि हुन्।”
पछिल्ला १० दिनका घटनाक्रमले आफूलाई निकै दुःखी बनाएको उल्लेख गर्दै प्रधानले यो आफ्नो व्यक्तिगत प्रतिष्ठाको विषय नभएको बताएका छन्।
उनले भने, “भारतका युवाशक्ति नै यस देशको वास्तविक शक्ति हुन्। मेरो संकल्प यही हो कि देशका युवाहरू भ्रमको जालमा नफसून्।”
