काठमाडौं । हिम स्टार ऊर्जा कम्पनी लिमिटेडले जेठ ३० गतेदेखि प्रारम्भिक सार्वजनिक निष्काशन (आईपीओ) मार्फत साधारण शेयर बिक्री शुरु गर्ने भएको छ । कम्पनीले आयोजना प्रभावित क्षेत्रका स्थानीय बासिन्दा तथा वैदेशिक रोजगारीमा रहेका नेपाली नागरिकहरूलाई लक्षित गर्दै आईपीओ निष्काशन गर्न लागेको हो ।
कुल ३७ करोड ३० लाख रुपैयाँको जारी पूँजीमध्ये ३० प्रतिशत हिस्सा अर्थात ११ करोड १९ लाख रुपैयाँ बराबरको ११ लाख १९ हजार कित्ता शेयर निष्काशनका लागि कम्पनीले अनुमति पाएको छ । यसमध्ये आयोजनास्थल प्रभावित स्थानीय बासिन्दाका लागि १ लाख ८६ हजार ५०० कित्ता शेयर छुट्याइएको छ । यी शेयर ओखलढुङ्गा जिल्लाको खिजिदेम्बा गाउँपालिका–८, साविक भुसिङ्गा गाविसका सम्पूर्ण वडा र सोलुखुम्बु जिल्लाको लिखुपिके गाउँपालिका–२, साविक गोली गाविसका वडा नं. १ देखि ५ सम्मका स्थानीयले आवेदन दिन सक्नेछन् ।
यसका साथै, वैदेशिक रोजगारीमा रहेका नेपाली नागरिकका लागि ९३ हजार २५० कित्ता शेयर खुला गरिएको छ, जुन सर्वसाधारणका लागि छुट्याइएको शेयरमध्ये १० प्रतिशत हो ।
आईपीओमा न्यूनतम १० कित्ता र अधिकतम १० हजार कित्तासम्मका लागि आवेदन दिन सकिने छ। आयोजना प्रभावित क्षेत्रका लागि आवेदन दिने अन्तिम मिति छिटोमा असार १३ र ढिलोमा असार २९ गतेसम्म कायम हुनेछ भने वैदेशिक रोजगारीमा रहेका नेपालीहरुले भने असार १३ गतेभित्र आवेदन दिनुपर्नेछ ।
कम्पनीको आईपीओ निष्काशन तथा बिक्री प्रबन्धक एनआईसी एशिया क्यापिटल लिमिटेड रहेको छ ।
