काठमाडौं । नेपाल धितोपत्र बोर्ड (सेबोन) अध्यक्ष नियुक्तिका लागि गठन गरिएको सिफारिस समितिका संयोजक डा. गुणाकर भट्टले राजीनामा दिएका छन्। भट्टले राजीनामा दिएको कुरा मिडियामार्फत् आफूले थाहा पाएको तर आधिकारिक रुपमा जानकारी नआएको सहसचिव अमृत लम्सालले बताएका छन् ।
सरकारले गत वैशाख पहिलो साता राष्ट्रिय योजना आयोगका उपाध्यक्ष भट्टको संयोजकत्वमा तीन सदस्यीय सिफारिस समिति गठन गरेको थियो। समितिले वैशाख १३ गते अध्यक्ष पदका लागि दरखास्त आह्वान गरेपछि ४७ जनाले आवेदन दिएका छन्।
आवेदन दिनेहरूमध्ये भट्टका नातेदार पर्ने अर्थात् ठुलोबुबाका छोरा डा. गोपाल भट्ट पनि रहेका छन्। आफन्तले आवेदन दिएपछि ‘स्वार्थको द्वन्द्व’ हुने भन्दै संयोजक भट्टले राजीनामा बुझाएको अर्थ मन्त्रालय एक अधिकारीले जानकारी दिए । ती अधिकारीका अनुसार मन्त्रिपरिषद्ले नयाँ संयोजक नियुक्त गरेपछि मात्रै अध्यक्ष नियुक्ति प्रक्रिया अघि बढ्नेछ।
सिफारिस समितिमा अर्थ सचिव धनश्याम उपाध्याय र पूर्व बैंकर भुवनकुमार दाहाल सदस्य रहेका छन्।
