काठमाडौं । प्रतिनिधि सभाका सभामुख डीपी अर्यालले रसुवामा गएको विनाशकारी बाढीबाट प्रभावित क्षेत्रको पछिल्लो अवस्था तथा बाढीबाट भएको जनधनको क्षतिबारे संघीय संसद् सचिवालयका पदाधिकारीसँग छलफल गरेका छन्।
सभामुख अर्यालले संघीय संसद्का महासचिव, प्रतिनिधि सभाका सचिव, राष्ट्रिय सभाका सचिव तथा सचिवालयका सम्बन्धित पदाधिकारीहरूसँग बाढीबाट प्रभावित क्षेत्रको अवस्थाका साथै विपद्का कारण संघीय संसद् र संसद् सचिवालयका कामकारबाहीमा पर्न सक्ने प्रभावबारे छलफल गरेका हुन्।
छलफलका क्रममा सभामुख अर्यालले विपद्को यस घडीमा संसद् सचिवालयले गर्न सक्ने सहयोग, आवश्यक समन्वय तथा प्रभावित क्षेत्रमा सहजीकरणका लागि सचिवालयलाई तयारी अवस्थामा रहन निर्देशन दिएका छन्।
उनले बाढी प्रभावित नागरिकको उद्धार, राहत तथा पुनर्स्थापनाका लागि आवश्यक सहयोग र समन्वयमा सचिवालयको भूमिका प्रभावकारी बनाउनुपर्नेमा जोड दिएका छन्।
सभामुख अर्यालले विपद्का कारण संसद्का नियमित कामकारबाहीमा पर्न सक्ने सम्भावित प्रभावको समेत मूल्यांकन गरी आवश्यक तयारी गर्न सचिवालयका पदाधिकारीलाई निर्देशन दिएका छन्।
रसुवामा आएको बाढीबाट ठूलो जनधनको क्षति हुनुका साथै सडक, पुल, विद्युत् तथा अन्य भौतिक संरचनामा क्षति पुगेपछि सरकारी तथा गैरसरकारी निकायले उद्धार, राहत र पुनर्स्थापनाका कार्यलाई तीव्रता दिइरहेका छन्।
