काठमाडौं । निर्वाचन आयोगले आफ्नो पुरानो सदस्यता रहेको दल त्याग गरी अन्य राजनीतिक दलमा प्रवेश गर्ने दुई उपाध्यक्षसहित १० जना स्थानीय तहका निर्वाचित जनप्रतिनिधिको पद रिक्त भएको जनाएको छ ।
आयोगले सम्बन्धित स्थानीय तहका ती निर्वाचित जनप्रतिनिधिले दल त्याग गरेको सम्बन्धमा आज सूचना प्रकाशन गरी उहाँहरूको पद रिक्त भएको जानकारी दिएको हो ।
यसैगरी, कोशी प्रदेशमा खोटाङको केपिलासगढी गाउँपालिका वडा नं ३ का वडाध्यक्ष तुलाराम राई, बराहपोखरी गाउँपालिकाउपाध्यक्ष भुवलराज राई र मोरङको धनपालथान गाउँपालिका वडा नं ५ का वडाध्यक्ष गयानन्द सरदारको पद रिक्त भएको छ ।
बागमती प्रदेशअन्तर्गत दोलखाको जिरी नगरपालिका वडा नं ६ का वडाध्यक्ष मर्जितबहादुर खड्का र वडा नं ३ का वडाध्यक्ष खेटराज घिमिरेको पद पनि रिक्त भएको छ ।
सुदूरपश्चिम प्रदेशको कैलालीस्थित बर्दगोरिया गाउँपालिकाका उपाध्यक्ष गणेशराज गिरीको पदसमेत दल त्यागका कारण रिक्त भएको आयोगको सूचनामा उल्लेख छ ।
आयोगका अनुसार विसं २०७९ को स्थानीय तह निर्वाचनमा तत्कालीन नेकपा (माओवादी केन्द्र), नेकपा (एकीकृत समाजवादी) लगायतका राजनीतिक दलबाट निर्वाचित भई पछि अन्य दलमा प्रवेश गरेका जनप्रतिनिधिको विवरण सम्बन्धित राजनीतिक दलको केन्द्रीय समितिको निर्णयसहित आयोगमा प्राप्त भएको थियो ।
राजनीतिक दलसम्बन्धी ऐन, २०७३ को दफा ३२ को उपदफा (१) तथा राजनीतिक दलसम्बन्धी नियमावली, २०७४ को नियम २२ बमोजिम दल त्याग गरेको देखिएकाले सम्बन्धित स्थानीय तहका निर्वाचित पद रिक्त भएको आयोगले जनाएको छ ।
आयोगले राजनीतिक दलसम्बन्धी नियमावली, २०७४ को नियम २२ को उपनियम (२) बमोजिम सम्बन्धित सबैको जानकारीका लागि सूचना प्रकाशन गरेको जनाएको छ ।
