काठमाडौं । परराष्ट्रमन्त्री शिशिर खनालले संयुक्त राष्ट्रसंघको महासभामा सहभागी हुन प्रधानमन्त्री बालेन शाहको नेतृत्वमा नेपाली प्रतिनिधिमण्डल अर्को साता संयुक्त राज्य अमेरिका जाने बताएका छन् ।
बिहीबार सिंहदरबारमा बसेको अन्तर्राष्ट्रिय सम्बन्ध तथा पर्यटन समितिको बैठकमा बोल्दै मन्त्री खनालले प्रधानमन्त्रीको नेतृत्वमा आफू लगायतको प्रतिनिधिमण्डल महासभामा सहभागी हुने जानकारी दिएका हुन् ।
संयुक्त राष्ट्रसंघको ८१औँ महासभाको उच्चस्तरीय छलफल तथा महासभाको सामान्य बहस सेप्टेम्बर २२ देखि २८ सम्म न्यूयोर्कमा हुँदैछ ।
मन्त्री खनालका अनुसार महासभामा नेपालको राष्ट्रिय हित, अन्तर्राष्ट्रिय सम्बन्ध तथा समसामयिक विश्व मुद्दासँग सम्बन्धित विषय उठाइनेछ । नेपालको सहभागिता अन्तर्राष्ट्रिय मञ्चमा मुलुकका प्राथमिकता र कूटनीतिक विषय प्रस्तुत गर्ने अवसरका रूपमा रहने उनले बताए ।
समितिको बैठकमा जलवायु परिवर्तनबाट नेपालले भोगिरहेको जोखिम, जलवायु न्याय, अन्तर्राष्ट्रिय सहयोग तथा जलवायु वित्तका विषयमा विज्ञहरूसँग समेत छलफल भएको थियो ।
बैठकमा पछिल्लो समय नेपालले भोगेका विपद्का घटनालाई समेत दृष्टिगत गर्दै जलवायु परिवर्तनका कारण नेपालजस्ता जोखिममा रहेका मुलुकले भोग्नुपरेका असरबारे अन्तर्राष्ट्रिय समुदायको ध्यानाकर्षण गराउने विषयमा छलफल भएको थियो ।
मन्त्री खनालले भने, ‘राष्ट्रसंघको महासभा अर्को हप्तादेखि सुरु हुँदैछ र नेपालको तर्फबाट सम्माननीय प्रधानमन्त्रीज्यूको नेतृत्वमा म लगायत एउटा प्रतिनिधिमण्डल अर्को हप्ता संयुक्त राष्ट्रसंघको महासभामा सहभागी हुन नेपालबाट प्रस्थान गर्दैछ।’
