काठमाडौं । रसुवास्थित भोटेकोसी र त्रिशूली नदीमा आएको विनाशकारी बाढीबाट प्रभावित निर्माणाधीन २१६ मेगावाटको माथिल्लो त्रिशूली-१ जलविद्युत् आयोजनास्थलमा खोजी तथा उद्धार कार्य तीव्र पारिएको छ। प्रवर्द्धक कम्पनी नेपाल वाटर एण्ड इनर्जी डेभलपमेन्ट कम्पनी (NWEDC) ले विज्ञप्ति जारी गर्दै बाढीका कारण हालसम्म ३९ जनाको मृत्यु भएको र ४३९ जना अझै सम्पर्कविहीन रहेको जनाएको छ।
बाढी आउने समयमा आयोजनास्थलमा प्रवर्द्धक कम्पनी, परामर्शदाता, मुख्य निर्माण व्यवसायी कोरियन कम्पनी डुसान, सिभिल सब-कन्ट्र्याक्टर पावर चाइना र इलेक्ट्रोमेकानिकलतर्फको एन्ड्रिज हाइड्रोका नेपाली, कोरियाली, चिनियाँ र भारतीयसहित करिब १,४३३ जना जनशक्ति कार्यरत थिए। जसमध्ये हालसम्म ८७७ जनाको सकुशल उद्धार गरिएको छ भने ७८ जना सम्पर्कमा आएका छन्।
सडक सञ्जाल पूर्ण रूपमा विच्छेद भएकाले कम्पनीले आफ्नै खर्चमा हेलिकोप्टरमार्फत दुईवटा मिनी एस्काभेटर, जेनेरेटर, र ग्यास-कटिङ उपकरण आयोजनास्थल पुर्याएर उद्धार कार्य सञ्चालन गरिरहेको छ। नेपाली सेना, सशस्त्र प्रहरी, नेपाल प्रहरी, कोरियाली विज्ञ र आयोजनाको संयुक्त टोलीले सुरुङ (अडिट-३), भूमिगत विद्युत् गृह र भीर-पहरामा खोजी गरिरहेका छन्। खोजी कार्यलाई प्रभावकारी बनाउन तालिमप्राप्त कुकुर र पर्वतारोही उद्धार टोली समेत परिचालन गरिएको छ।
आयोजनास्थलबाट निकालिएका शवहरूलाई नेपाली सेनाको हेलिकोप्टरमार्फत नुवाकोटको विदुरस्थित सेनाको क्याम्पमा ल्याइएको र आफन्तहरूलाई सनाखतका लागि सहजीकरण भइरहेको छ। साथै, कम्पनीले मृतकका परिवारलाई प्रारम्भिक राहतस्वरूप काजक्रिया खर्च उपलब्ध गराउनुका साथै सम्पर्कविहीनका परिवारलाई मनोसामाजिक परामर्श प्रदान गरिरहेको जनाएको छ।
