काठमाडौं । फ्रान्सेली क्लब पेरिस सेन्ट जर्मेन (पिएसजी) ले युइएफए च्याम्पियन्स लिगमा स्पेनिस क्लब भिल्लारियललाई ६–० ले हराएको छ।घरेलु मैदानमा पिएसजीले खेलको सुरुवाती १७ मिनेटमै ४ गोल गरेको थियो। खेलको २० मिनेट नपुग्दै भिल्लारियलका केही समर्थक मैदान छाडेर बाहिरिएका थिए।
नवौं मिनेटमा जोआओ नेभेसले कर्नरबाट आएको बलमा गोल गर्दै पिएसजीलाई अग्रता दिलाए। त्यसपछि १२ औं मिनेटमा डेजिरे डुएले गोलकिपर पिटर गुलाचीको खराब पासको फाइदा उठाउँदै अग्रता दोब्बर बनाए। लगत्तै १३ औं मिनेटमा सन्नी मायुलुले तेस्रो गोल थपे। भिल्लारियलले आफ्नै रक्षापंक्तिबाट बल अगाडि बढाउने क्रममा गुमाएपछि उनले गोल गरेका थिए। फाबियन रुइजले १७औं मिनेटमा गोल गर्दै पिएसजीलाई ४–० को अग्रता दिलाए।
दोस्रो हाफमा रुइजले व्यक्तिगत दोस्रो गोल गरे। उनले विपक्षी डिफेन्डरलाई छक्याउँदै उत्कृष्ट फिनिसिङ गरेका थिए। १७ वर्षीय डेभिड बोलीले ७८ औं मिनेटमा गोल थपेपछि पिएसजीले ६–० को फराकिलो जित पक्का गर्यो।
यो सिजन च्याम्पियन्स लिगमा पिएसजीले बार्सिलोना र म्यानचेस्टर सिटीविरुद्ध पनि समान गोल गरिसकेको छ। जितसँगै पिएसजी १२ अंक जोडेर लिग चरणको शीर्ष स्थानमा छ। पिएसजीले नोभेम्बर २५ मा रोमासँग खेल्नेछ। एक जित मात्र निकालेको भिल्लारियलले सोही दिन स्लाभिया प्रागको सामना गर्नेछ।
