काठमाडौं ।फ्लाईदुबईले आजदेखि पोखरा अन्तर्राष्ट्रिय विमानस्थलबाट युएईको दुबईका लागि नियमित सिधा उडान सुरु गरेको छ। कम्पनीको आधिकारिक वेबसाइटअनुसार दुवैतर्फका विभिन्न श्रेणीका उडानका लागि तय गरिएको भाडा दर यस प्रकार रहेको छ ।
पोखराबाट दुबईतर्फको नन्-स्टप उडानको प्रारम्भिक एकतर्फी भाडा नेपाली ४६ हजार ४ सय ९६ रुपैयाँ तय गरिएको छ। कम्पनीले चार प्रकारका टिकट श्रेणी निर्धारण गरेको छ, जसमध्ये सबैभन्दा सस्तो ‘लाइट’ श्रेणीको भाडा ४६ हजार ४ सय ९६ रुपैयाँ छ, जसमा ७ किलो हातमा बोक्ने झोला (ह्यान्ड ब्यागेज), खाना र उडानभित्रको मनोरञ्जन सुविधा समावेश छ। त्यसैगरी ३० किलोसम्मकोचेक-इन ब्यागेज सुविधा पाइने ‘भ्यालु’ श्रेणीको ४८ हजार २ सय ८२ रुपैयाँ, ४० किलो ब्यागेज र उडान मिति परिवर्तन सुविधा भएको ‘फ्लेक्स’ श्रेणीको ५३ हजार १ सय ३ रुपैयाँ तथा विशेष आरामदायी र उच्चस्तरीय सेवा उपलब्ध हुने ‘बिजनेस’ श्रेणीको सुरुवाती भाडा ८० हजार ६ सय २२ रुपैयाँ राखिएको छ।
यसैगरी, दुबईबाट पोखरा फर्किने सिधा उडानको प्रारम्भिक एकतर्फी भाडा ८ सय ५० युएई दिराम कायम गरिएको छ। फर्किने उडानमा पनि चारवटै श्रेणी उपलब्ध छन्। जसअन्तर्गत ‘लाइट’ श्रेणीको भाडा ८ सय ५० दिराम (७ किलो ह्यान्ड ब्यागेज, खाना र मनोरञ्जनसहित), ३० किलो ब्यागेज पाइने ‘भ्यालु’ श्रेणीको ८ सय ९१ दिराम, ४० किलो ब्यागेज र सिट छनोट सुविधा भएको ‘फ्लेक्स’ श्रेणीको ९ सय ८४ दिराम तथा उच्चस्तरीय ‘बिजनेस’ श्रेणीको सुरुवाती भाडा ३ हजार ७ सय १४ दिराम निर्धारण गरिएको छ।
वेबसाइटमा देखाइएको भाडादर सुरुवाती आधारभूत मूल्य भए पनि टिकट खरिद गर्दा अन्तिम भुक्तानी रकममा केही फरक पर्न सक्नेछ। अनलाइन पेमेन्ट गर्दा लाग्ने कार्ड/बैंक प्रशोधन शुल्क , विदेशी मुद्रा विनिमय दर , सिट छनोट, थप ब्यागेज वा यात्रा बिमा जस्ता ऐच्छिक सुविधाहरू थप गर्दा अन्तिम मूल्यमा केही रकम वृद्धि हुन सक्नेछ।
