काठमाडौं । कञ्चनपुरस्थित महाकाली नदीमा बाढीको बहाव घट्न थालेपछि वनवासा पुलमा चारपाङ्ग्रे सवारीसाधनको आवागमन खुला गरिएको छ ।
बाढीका कारण पानीको सतह बढेपछि सुरक्षाका कारण आइतबारदेखि नेपाल–भारत सीमा जोड्ने सो पुलमा चारपाङ्ग्रे सवारीसाधनको आवागमन रोकिएको थियो ।
जिल्ला प्रहरी कार्यालय कञ्चनपुर सूचना अधिकारी टेक रावतका अनुसार महाकाली नदीमा बाढीको बहाव घटेसँगै सवारी बनबासा पुलमा चार पाङ्ग्रे सवारी साधन आवत जावत सुचारू गरिएको हो ।
उनका अनुसार ११:०० बजे महाकाली नदिमा पानीको बहाव ९८,२७२ ( अन्ठानब्बे हजार दुई सय बहत्तर ) क्यू सेक मापन गरिएको, नेपाल भारत सिमा जोड्ने बनबासा पुलमा चार पाङ्ग्रे सवारी साधन आवत जावत सुचारू गरिएको छ ।
यसअघि सोमबार बिहान ०७:०० बजे महाकाली नदिमा पानीको बहाव १,०९,१४४ ( एक लाख नौ हजार एक सय चवालीस ) क्यू सेक मापन गरिएको, नेपाल भारत सिमा जोड्ने बनबासा पुलमा चार पाङ्ग्रे सवारी साधन आवत जावत बन्द नै रहेको थियो ।
