गुल्मी । नेकपा एमाले का नेता तथा गुल्मी क्षेत्र नं २ का उम्मेदवार गोकर्ण विष्टले नवनिर्वाचितगोविन्द पन्थीलाई बधाई दिएका छन्।
निर्वाचन परिणाम सार्वजनिक भएलगत्तै सामाजिक सञ्जालमार्फत सन्देश जारी गर्दै विष्टले राष्ट्रिय स्वतन्त्र पार्टी (रास्वपा) बाट विजयी उम्मेदवार पन्थीलाई बधाई तथा कार्यकालको सफलताको शुभकामना व्यक्त गरेका हुन्।
निर्वाचनमा पराजित भए पनि विष्टले आफू सधैं जनताको साथमा रहने प्रतिबद्धता जनाएका छन्। चुनावी हारलाई स्वभाविक प्रक्रियाको रूपमा लिँदै उनले लेखेका छन्, एउटा निर्वाचनको हार वा जीतले समाज परिवर्तनको लामो यात्रालाई खासै फरक पार्दैन। आर्थिक तथा सामाजिक रूपान्तरण, सामाजिक न्याय र राष्ट्र तथा जनताको हितमा अझ दृढतापूर्वक लागिरहनेछु।
अपेक्षाकृत नतिजा नआएको भए पनि नेता विष्टले पार्टी पंक्तिलाई विचलित नहुन आग्रह गरेका छन्। उनले सम्पूर्ण कार्यकर्तालाई धैर्यता र उच्च मनोबलका साथ अघि बढिरहन अपिल गरेका छन्।
विष्टले आफ्नो चुनावी अभियानमा अहोरात्र खट्ने सहयोद्धा र सद्भाव राख्ने मतदातालाई धन्यवाद दिएका छन्। साथै, निर्वाचन शान्तिपूर्ण रूपमा सम्पन्न गराउन भूमिका खेल्ने राष्ट्रसेवक कर्मचारी, सुरक्षाकर्मी, राजनीतिक दलका प्रतिनिधि र सञ्चारकर्मीहरूप्रति पनि उनले आभार प्रकट गरेका छन्।
