काठमाडौं । कर्मचारी खर्चमा गरिएको उच्च बृद्धिका बावजुद पनि राष्ट्रिय बाणिज्य बैंकको मुनाफामा उच्च बृद्धि भएको देखिएको छ । बैंकले आज प्रकाशित गरेको वित्तीय विवरण अनुसार मुनाफामा झण्डै दोब्बर बृद्धि भई २ अर्ब ७६ करोड २० लाख ५९ हजार ५२१ पुगेको छ ।
अघिल्लो बर्षको तुलनामा बैंकको मुनाफामा दोब्बर भन्दा बढिले बृद्धि गर्न सफल भएको छ । अघिल्लो बर्ष बैंकको मुनाफा एक अर्ब २० करोड ४३ लाख ७० हजार ८५० रुपैयाँ आर्जन गरेको थियो ।
बैंकको खुद ब्याज आम्दानी उच्च बृद्धि भई सात अर्बबाट बढेर आठ अर्ब ७० करोड पुगेसँगै मुनाफामा उछाल आएको हो । त्यस्तै, बैंकको खुद आम्दानी एक अर्ब ६६ करोड रुपैयाँ बढी आर्जन हुँदा मुनाफामा उछाल आएको देखिएको छ । बैंकले समीक्षा अवधीमा कर्मचारी खर्च उच्च बृद्धि गरेको देखिएको छ । अघिल्लो आवको यसै अबधीमा तीन अर्ब २३ करोड रुपैयाँ कर्मचारी खर्च गरेको बैंकले यस बर्ष तीन अर्ब ९२ करोड नाघेको छ । सरकारी लगानीमा सञ्चालित बैंकले चालु आवको नौ महिनामा उल्लेख्य प्रगति गर्न सफल भएको देखिएको छ ।
त्यस्तै, बैंकको खराव कर्जा सामान्य घटेर ४.६९ प्रतिशतबाट ४.४८ मा झरेको छ । बैंकको वितरणयोग्य मुनाफा ३१ करोड ६१ लाख ५७ हजार रुपैयाँ रहेको छ । बैंकको प्रतिसेयर आम्दानी ३.८० रुपैयाँ रहेको छ ।
